Thënia monumentale e Edi Ramës se “turkofobët janë idiotë”, thënë pas një vizite në Prizren me presidentin Erdogan, si një kundërpërgjigje ndaj një qasjeje të mbrapshtë mediale në Kosovë, nuk ka pse mos adoptohet dhe si “islamofobët janë idiotë”. Sidomos këto kohë në Kosovë, me një furtunë islamofobike të disa segmenteve dhe figurave publike, të cilëve u mungon dhe logjika më minimale për të përligjur një lloj urrejtje patologjike ndaj të gjithë atyre muslimanëve, sidomos në Kosovë, të cilët kanë zgjedhur të bëjnë jetë islame, njëherësh duke qenë qytetarë shembullorë, pra kontributorë dhe për atdhe e shoqëri, jo me fjalë, por siç dje me armë, sot si njerëz që mbjellin të mirën shoqërore në çdo aspekt. Dhe më shqiptarë se kaq nuk ka. Kjo, për të gjitha ata që kanë sajuar dikotominë idiote me theks përjashtues kombi/feja, e cila është dikotomi përplotësuese, vërtetuar kjo përgjatë gjithë historisë njerëzore dhe jo vetëm te qenia e shqiptarit.
Së fundi, është avokati i njohur kosovar Arianit Koçi, i cili i ka hedhur vetes në erë jo vetëm dijen, të lexuarit, por dhe moralin deri diku, pasi ka marrë një deklaratë dhe e ka shpërfytyruar gabimisht. Ja ka vënë re këtë hoxha i njohur prishtinali Hysamedin Abazi.
Ja ç’farë i thotë ai avokatit të njohur, duke e trajtuar dhe si mik:
“Gjysmë e vërteta është gënjeshtra më e shpifur
I nderuar avokat Koçi, e di se ju e njihni mirë të nderuarin Dr. Mevlud Dudiç, dhe e dini mirë se ai është Kryetar i Bashkësisë Islame të Sanxhakut (Pazari i Ri), dhe se ai është boshnjak. Fjalimi që ka mbajtur në Preshevë para vëllezërve të tij muslimanë shqiptarë ka qenë i duhuri dhe pa asnjë ofendim të çfarëdo lloji qoftë. Ai me këtë rast, pos tjerash tha:
‘Unë nuk jam shqiptar, dhe as ju nuk jeni boshnjakë, por të gjithë jemi vëllezër muslimanë…’. gjë që kuptohet se ka folur nga aspekti fetar. Prandaj, ju propozoj ta largoni postimin gjysmëinformues, për të mos thënë tendencioz dhe të kërkoni falje nga ky veprim i cili vetëm të vërtetës nuk i kontribuon. Besoj se të gjithë pajtohemi se gjysmë e vërteta është gënjeshtra më e shpifur.
Me respekt, Husamedin Abazi, miku i juaj dhe imami i xhamisë 4 Llullat, Prishtinë”.
Pra, mjafton ky sqarim, i cili nxjerr në pah një spekullim të rëndomtë dhe keqdashës, nga ku kullon urrejtje, për të huazuar atë çfarë Rama do thoshte pak vite më parë se “turkofobët janë idiotë”. Dhe meqë në këtë rast, turkofobët janë thjesht islamofobët kur është rasti i Kosovës, kjo idiotësi shkon dhe për këta të fundit. Ama tej idiotësisë ka dhe ligësi…/tesheshi.com/
