Prokurorja Speciale publike, Katica Janeva apeloi tek të gjithë që të përmbahen nga etiketimet dhe diskreditimi i Prokurorisë Speciale, e cila do të hetoje të dyshuar për krime, të lidhura dhe dala nga përmbajtja e përgjimeve.
“Ishim të vetëdijshëm se puna jonë nuk do të jetë imune ndaj kritikave dhe se subjekte të ndryshme do të tentojnë që ta interpretojnë punën e kësaj Prokurorie Publike, varësisht prej interesave të tyre”, theksoi Janeva për Televizionin 24 Vesti, në lidhje me kritikat nga VMRO-DPMNE në pushtet, se Janeva po punon për LSDM-në dhe opozitën, me kërkesë për t`u liruar nga paraburgimi Zoran Verushevski.
Ajo shtoi me plot bindshmëri duke thënë se “kjo Prokurori Publike vepron në mënyrë profesionale duke i respektuar rregullat ligjore, gjatë të cilës janë marr parasysh edhe praktika gjyqësore ndërkombëtare dhe vendore, kështu që akuzat e adresuara tek ne, janë të pabaza”.
Nga ana tjetër, është kontradiktore kur VMRO-DPMNE deklaron se nuk beson në pavarësinë e Katica Janevës, prokurore kjo që është zgjedhur me pëlqimin e tyre. Ata shprehin rezervë serioze ndaj çdo hapi të cilin do ta ndërmarrë ajo në të ardhmen, si në pikëpamje të paanshmërisë së saj, ashtu edhe në pikëpamje të legjitimitetit të veprimeve të saja.
E gjithë kjo vjen pasi që disa mediume kumtuan se Janeva i ka kërkuar Këshillit Penal të Gjykatës Themelore Shkup që masa e paraburgimit për ish-shefin e policisë sekrete, Zoran Verushevski të dyshuar për rastin “Puç”, të zëvendësohet me garanci.
Sipas anëtarit të Komitetit ekzekutiv të VMRO-DPMNE-së, Antonio Milloshovski, vendimi i Janevës të mos kërkojë vazhdim të paraburgimit për Zoran Verushevskin është skandaloz, jo i drejtë dhe shumë i rrezikshëm dhe me të Janeva i ka shkaktuar dëm të pavlerësueshëm sistemit juridik të Republikës së Maqedonisë në praktikën juridike.
“Atë që Zoran Zaev e porositi dhe urdhëroi, Verushevski të lirohet nga paraburgimi, Katica Janeva e përmbushi. E turpshme dhe e mjerueshme është lehtësia dhe arroganca me të cilën Janeva, në mënyrë nënshtruese dhe vardisëse, të përmbushë kërkesën e Zaevit… U konstatuan të gjitha informatat në opinion për lidhje të ngushtë dhe koordinim ndërmjet Janevës dhe Zaevit, si dhe se Janeva edhe do të veprojë ashpër sipas urdhrit partiak të LSDM-së”, tha Milloshoski.
Ai shtoi se Janeva do të jetë bashkëpjesëmarrëse e drejtpërdrejtë në vepra antijuridike dhe penale nëse Verushevski ik dhe siç tha, ajo do të jetë bashkëpjesëmarrëse në vepra penale nëse Verushevski disponon me materiale të përfituara në mënyrë joligjore. /tesheshi.com/
