Pasi individë dhe organizata të shumta dënuan vendimin e Komitetit Letrar të Akademisë Mbretërore të Shkencave Suedeze për dhënien e Çmimit Nobel për shkrimtarin polemik austriak Peter Handke, Fondacioni Nobel tha që ky çmim nuk mund të revokohet.
“Çmimi Nobel nuk mund të revokohet. Statutet e Fondacionit Nobel nuk e përmendin një mundësi të tillë. Asnjë nga Bordet e Çmimeve të Stokholmit ose Oslos nuk e kanë konsideruar ndonjëherë heqjen e çmimit pasi është dhënë”, i tha Mikael Ostlund, një zëdhënës në Fondacionin Nobel, kur u pyet nëse për Handken mund të tërhiqej çmimi.
Fondacioni Nobel administron financat dhe administratën në lidhje me Çmimin Nobel.
Fituesi i këtij viti për Letërsinë, shkrimtari austriak Peter Handke, është i njohur jo vetëm për arritjet e tij letrare, por edhe për pikëpamjet e tij të diskutueshme për zhvillimet në rajon, për mohimin e gjenocidit të kryer në Srebrenicë dhe thirrjen për mbrojtjen e Sllobodan Milosheviçit.
Në prill të vitit 1999, The Guardian botoi një artikull me titull “Stand up If You Support Serb”, në të cilin shkruhej për qëndrimet e Handkes ndaj ngjarjeve të ish-Jugosllavisë dhe luftës në Bosnje.
Në mars 2004, ai së bashku me shkrimtarin kanadez Robert Dickson nënshkruan një apel duke kërkuar mbrojtjen e Sllobodan Milosheviçit, dhe në të njëjtin vit e vizituan atë në burgun e Hagës. /tesheshi.com/
