Nënkryetarja e Komisionit të Ekonomisë dhe njëkohësisht deputetja e Partisë Demokratike, Jorida Tabaku thotë se në Shqipëri, mund të fitosh një tender publik vetëm nëse je i lidhur me qeverinë, duke iu referuar rastit të Edmond Begos, i cili sipas saj, ka ndryshuar katër apo pesë emra duke krijuar kompani nga hiçi për të fituar tendera publikë.
Sipas saj, “ky nuk është vetëm konkluzioni i Partisë Demokratike, ky është konstatim i raportit të fundit të DASH, i Gjykatës Europiane të auditimit dhe strategjisë së zgjerimit. Por kjo fatkeqësisht është dhe e vërteta e publikuar nga raportet e Agjencisë së Prokurimit Publik”.
Por, theksoi ajo, “për të përfituar një tender publik është e domosdoshme që të jesh edhe brenda rrethit familjar të kryeministrit Rama, oligark brenda kryeministrit, ose kriminel me rekorde kriminale”.
“Firma ABS që Partia Demokratike po denoncon sot, jo rastësisht është e lidhur me familjen e kryeministrit, ka mundur të përfitojë 15.6 milionë euro tendera nga shtatori 2013 deri më sot. Kompania “Advanced Business Solutions” zotërohet në bashkëpronësi nga baxhanaku i kryeministrit Armand Frangu, i cili së bashku me kompaninë B360 marrin pjesë gjithmonë në të njëjtat tendera, gjithmonë duke ndarë përfitimet me njëri-tjetrin”, tha Tabaku.
“Partia Demokratike angazhohet që çdo tenderim abuziv, ta çojë përpara ligjit. Angazhohet për të ndryshuar ligjin e konçesioneve, Ligjin e PPP-ve dhe Ligjin e Prokurimeve, për të siguruar një garë të hapur, duke besuar se vetëm me një garë të hapur mund të çlirohet ekonomia, mund të vijnë investimet e huaja, mund të rritet punësimi. Kjo që po i ndodh sot ekonomisë është thjeshtë kapja e rradhës nga kryeministri dhe familjarët e tij”, përfundon Tabaku. /tesheshi.com/
