Një rastësi e çuditshme ndodh në të njëjtën ditë në Shqipëri dhe në Kosovë.
Më datën 3 gusht, kur Hashim Thaçi ka thirrur seancën konstituive të Parlamentit, në Kosovë mbërrin delegacioni i gjerë i Prokurorisë Speciale për Krimet e Luftën ndërsa në Shqipëri hyn në fuqi ligji mbi Prokurorinë Speciale antikorrupsion SPAK.
Siç bën të ditur tesheshi.com, prokurori amerikan David Schvvendiman do të mbërrijë në Prishtinë me një delegacion të gjerë, ku do të ketë kryesisht “takime operative”.
Të parin, grupi i amerikan mësohet se do të takojë Sami Lushtakun dhe disa pjesëtarë të grupit të Drenicës.
Hetimi mësohet se do të zhvillohet në një logjikë lineare por pa qenë spektakolar dhe për të ndikuar politikisht.
Atëherë kur do të ketë dëshmi të salduara dhe dëshmitarë që janë gati të sjellin prova dhe në gjykatë, vetëm atëherë do të procedohet në veprime ligjore, siç është kërkesa për të marrë të pandehur apo hetim ndaj parlamentarëve, apo ministrave të mundshëm.
Gjithsesi të rejat e mëdha mbi çështjet e Prokurorisë Speciale të Kosovës pritet të dalin nga vjeshta.
Rastësia ka sjellë, që në të njëjtën datë, më 3 gusht në Shqipëri të hyjë në fuqi me të drejta të plota Prokuroria Speciale Antikorrupsion, institucion i parashikuar nga ndryshimet kushtetuese që u miratuan në korrikun e një viti më parë.
Më 3 gusht hyjnë në fuqi ndryshimet në Kodin e Procedurës Penale.
Pak kohë më parë, mazhoranca qeverisëse miratoi ndryshimet në të dhe ky Kod do sjellë një reformim të rëndësishëm të reformës në drejtësi. Aty u futën një sërë përcaktimesh të reja, ndër më kryesoret janë kompetencat e SPAK. Më 3 Gusht hyn në fuqi Kodi dhe përcaktohen zyrtarisht kompetencat që do ketë Prokuroria dhe Gjykata e Posaçme, duke i hapur në këtë mënyrë rrugë arrestimeve VIP.
Janë plot 17 vepra penale që do të duhet të gjykohen dhe hetohen nga SPAK, pasi ky organizëm të ngrihet.
Pra pas 3 gushtit, hapet rruga dhe nisin më pas përgatitjet për të ngritur këto organe kaq të rëndësishme, pjesë e së cilave do jetë dhe Byroja Kombëtare e Hetimit.
Sipas përcaktimeve në ligj, Struktura e Posaçme Antikorrupsion do hetojë dhe krimin e organizuar, por sa i takon korrupsionit janë 17 vepra penale. Ndër këto mund të përmenden: Neni 244- Korrupsioni aktiv i personave që ushtrojnë funksione publike. Ky është dhe neni kryesor, përmes të cilit pritet që të dërgohen pas hekurave gjyqtarë, prokurorë, politikanë apo funksionarë të tjerë.
Por interesant është fakti se në hetim mund të merren dhe punonjës të huaj. Ndërkohë, pjesë e SPAK do jetë dhe neni 245 i Kodit Penal, i cili ka të bëjë me korrupsionin aktiv të funksionarëve të lartë shtetërorë ose të zgjedhurve vendorë.
Një tjetër nen që do të prekë një pjesë të madhe të pushtetarëve dhe zyrtarëve shqiptarë, pasi vetëm nga Kontrolli i Lartë i Shtetit janë kallëzuar gjatë 3 viteve të fundit rreth 500 zyrtarë, është neni 258, që ka të bëjë me abuzimet me tenderat. Në Kodin e Procedurës Penale është hequr dhe një tjetër kompetencë, ajo e korrupsionit të dëshmitarit. Ndërkohë në listë është dhe korrupsioni aktiv, apo pasiv i gjyqtarit dhe prokurorit.
Me hyrjen në fuqi të Kodit të Procedurës Penale, rrudhen kompetencat e prokurorive dhe sidomos kryeprokurorit. Aktualisht kanë qenë kompetencë e Krimeve të Rënda apo Prokurorisë së Përgjithshme hetimi i zyrtarëve të lartë, mirëpo pasi të hyjë në fuqi Kodi, këto kompetenca i kalojnë SPAK dhe kjo do të thotë se Adriatik Llalla del jashtë loje.
Një tjetër element i rëndësishëm që përcakton Kodi i Procedurës Penale është se pasi të ngrihet Prokuroria Speciale, asaj do i kalojnë të gjitha dosjet që janë nën hetim nga prokurori, që kanë të bëjnë me 17 veprat penale në fjalë. Pra, çdo dosje që është e hapur për zyrtarë të lartë, pas 1 gushtit duhet të nisë përgatitjet që të kalojë te SPAK.
Sinjalet janë se vjeshta do sjellë tërmet si në drejtësi ashtu dhe në politikë. Fillimisht nis vetingu, ndërsa më pas fillon ngritja e organeve antikorrupsion, të cilat do ndjekin shembujt kroatë e rumunë, ku nuk i kanë shpëtuar burgut ministra, deputetë dhe kryeministra.
/tesheshi.com/
