Autoritetet greke kanë hartuar një raport në lidhje me disa sulme dhe grabitje të kryera në ishullin Zakyntho. Sipas policisë, banda kriminale greke dhe shqiptare kanë sulmuar me eksplozivë bankomatet duke grabitur mijëra euro.
Raporti, sipas mediave greke, i është dorëzuar edhe njësive kundër terrorizmit, ndërsa në veprat kriminale ka dyshime se janë përfshirë edhe punonjës të policisë.
Në raport përfshihet edhe grabitja që iu bë një biznesmeni, të cilit iu morrën 580 mijë euro. Të implikuar në këtë grabitje ishte një shtetas shqiptar që morri 80 mijë euro, një polic grek që morri 250 mijë euro, ndërsa pjesa tjetër e parave ndodhen në Zakyntho.
Zyrtari i korruptuar i policisë, identiteti i të cilit nuk bëhet i ditur, investoi paratë duke ndërtuar dy qendra argëtimi dhe ka blerë 20 makina të cilat i jep me qira, evidentohet në raportin sekret.
Shqiptari tjetër që qëndron në ishullin e Zakyntho dhe një bashkëpunëtor i tij investuan gjithashtu paratë e grabitura të biznesmenit. Ata hapën dy restorante dhe hotele. Autoritetet lokale të ishullit grek janë vënë në dijeni për transaksionet bankare, ndërkohë që hetimet vazhdojnë. Pavarësisht pastrimit të parave, shqiptari dhe bashkëpunëtori i tij vazhduan aktivitetin e tyre kriminal. Ata organizuan vjedhjen e një shtëpie, ku morën 180 mijë Euro. Emrat e shqiptarëve të përfshirë nuk janë bërë publik për shkak të sekretit hetimor, raporton tv klan.
Ndërkohë, një pjesë e policëve grekë të korruptuar janë klientë të rregullt të disa lokaleve të natës në ishull, ku kryhet trafik droge. Ata “mbyllin sytë” kundrejt përfitimeve.
Në Zakyntho, në bashkëpunim edhe me shtetas grekë dhe zyrtarë të korruptuar të policisë, vepron i njëti grup shqiptarësh, të cilët merren edhe me trafikun e drogës. Kjo e fundit mbahet e magazinuar në disa banesa në Athinë, dhe më pas trafikohet drejt ishullit të Zakyntho ku dhe u shitet turistëve kundrejt çmimeve të larta.
Shitja e drogës bëhet pikërisht në lokalet dhe bizneset e anëtarëve të bandës. Raporti nxjerr në pah gjithashtu se anëtarët e bandës kriminale janë të pajisur me kallashnikovë dhe armë të tjera, kurse rreth dy muaj më parë banda kriminale bleu eksplozivë për të grabitur bankomatet. Muajin e kaluar u vodhën tre pika bankomatesh përmes shpërthimeve me eksploziv. /tesheshi.com/
