Shqipëria është renditur në vendin e parë në rajon dhe në të 13-tin në botë në indeksin e tregtisë së lirë për vitin 2017. Ky lajm u konfirmua nga ”Heritage Foundation”, që konsiderohet si një nga institutet kërkimore më të njohur në fushën e ekonomisë në botë.
Përmes një konference për mediat, ministrja e Ekonomisë, Milva Ekonomi njoftoi konkludimin e këtij raporti, që sipas saj është arritur përmes reformave dhe lehtësirave të krijuara për biznesin dhe shkëmbimeve tregëare.
“Ky është një tregues domethënës për vendet që aplikojnë barriera të ulta tregtare, që ndikon në zgjerimin e shkëmbimeve tregtare dhe rritjen ekonomike. Qasja kryesore e këtij indeksi bazohet në peshën që zënë tarifat doganore si dhe barrierat jo tarifore. Shqipëria vlerësohet me një rezultat mbresëlënes, sepse ka çfarë të tregojë.
Shqipëria po punon intensivisht për reduktimin e barrierave jo tarifore dhe thjeshtimin e procedurave doganore.
Si vend anëtar i CEFTA vendi ynë zbaton me përpikmëri protokollin për lehtësimin e tregtisë me keto vende, duke filluar nga: Transparenca e ligjeve, rregullat dhe procedurat e tregtisë; Shkëmbimin elektronik te dokumenteve që shoqërojnë mallrat; Njohjen automatike te dokumentave dhe testeve laboratorike; Unifikimin e orareve në pikat e kufirit etj.”, tha Ekonomi.
Sipas “Heritage Foundation Shqipëria renditet e 13-ta në botë nga 186 ekonomi dhe vendi ynë rezulton të jetë i përmirësuar me 20 pozicione në renditje.
Pak muaj më parë, u publikua edhe raporti i Bankës Botërore “Doing Business 2017”, ku Shqipëria u rendit nëvendin e 58-të/190 vende, duke u përmirësuar me 32 pozicion, por shumë ekspertë ekonomie e vlerësuan me nota kritike dhe te dyshimta se të dhënat ishin shumë kontradiktore dhe thuajse të pabesueshme./tesheshi.com/
