Një raport i përpiluar para më shumë se dy muajsh, i cili tregon lidhjet mes politikanëve kosovarë dhe zyrtarëve të EULEX-it si dhe ndërhyrjet që kanë bërë në të gjitha format në punën e EULEX-it, është publikuar sonte nga ekipi i emisionit “Puls” në KTV. Raporti ishte hartuar nga një ekip hetuesish të BE-së, pas dyshimeve për korrupsion dhe afërsi të zyrtarëve të lartë të EULEX me politikanë vendorë.
Në këtë pjesë të raportit konfidencial përmenden 13 emra vendorë dhe ndërkombëtarë. Që nga ish-shefi i EULEX-it, Bernd Borchard, ish-kryeministri Hashim Thaçi, kryetari i kuvendit Kadri Vesli, ministri i drejtësisë, Hajredin Kuçi, ish-shefi tjetër i EULEX-it, Xavier Bout de Marnhac e deri tek ish-kryeprokurori, Ismet Kabashi si dhe përshkruhen situata e parashikueshme, veprimet e tyre, qëllimet dhe veprimet që kanë ndodhur dhe ato që pritet të ndodhin, raporton Koha.net.
Tre janë personat kryesorë që përmenden në këtë raport. Persona kyç janë Hajredin Kuçi, Bernd Borchard dhe…Mariana Papa, një zyrtare shqiptare që pavarësisht pozitës si oficere e lartë e antikorrupsionit, përshkruhet si person i fuqishëm në EULEX. Padyshim dhe Mats Mason, ish-kreu i divizionit ekzekutiv në EULEX.
Ky grup personash, sipas raportit, kanë pasur ndikim direkt në vendime të rëndësishme në fushën e drejtësisë. Ndërsa për ish-shefin e EULEX-it, raporti tregon aferën me Mariana Papën dhe tentimin e marrjes së pozitës së shefit të mbrojtjes së përbashkët dhe politikës së sigurisë. Në këtë tentim, sipas raportit, Borchard ka dështuar. Ndërsa njeriu tjetër me fuqi në EULEX, Mats Mason, qëllimin e parë e ka pasur të marrë pozitën e shefit të EULEX-it, mirëpo ka dështuar.
Qëllimi i dytë dhe shumë i rëndësishëm në gjithë këtë raport është marrja e pozitës së kryetarit të Gjykatës Speciale. Në bazë të raportit, Mason është duke tentuar që më çdo kusht ta marr këtë pozitë.
Ndërkohë, për kryetarin e PDK-së dhe zëvendëskryeministrin, Hashim Thaçi, raporti tregon se ai është duke punuar vazhdimisht që të bëhet president.
