Qeveria, pa ministrat teknikë tashmë të dorëhequr, e konsideron proçedurialisht jo korrekt raportin mbi zgjedhjet e 25 qershorit.
Raporti që përmban rreth 100 faqe dhe ku përfshihen gjetjet dhe sugjerimet mbi fushatën dhe ditën e votimit në zgjedhjet e përgjithshëm parlamentare, i është dërguar me postë Qeverisë, bashkë me dorëheqjet e ministrave teknikë dhe zv.kryeministres.
Dokumenti do t`I vihet në dispozicion trupit diplomatik në Tiranë, por edhe kancelarive në Bruksel, Berlin si dhe SHBA. Në raport evidentohen një seri shkeljesh nga më minimalet deri në përdorimin e bandave në disa qarqe për deformimin e vullnetit të zgjedhësve.
Por duket se debati do të nisë me faktin nëse raporti do të pranohet apo jo dhe më tej do të mund të debatohen çështjet që ai përmban.
Raporti nuk është miratuar nga Task Force, sipas parashikimeve të vendimit të qeverisë, çka e bën atë sipas PS-së jo në rregull proçedurialisht.
Një burim zyrtar qeveritar tha për TCH se e konsideronte vetëm një raport të ministrave teknikë, i pa votuar nga “Task Forca”. I pyetur se në çdo rast ministrat teknikë kanë shumicën në “Task Forcë”, burimi qeveritar tha se mosrespektimi i proçedurave e bën raportin të paligjshëm.
Në raport nuk thuhet që ai të jetë miratuar nga “Task Forca” dhe se ai është firmosur vetëm nga Ledina Mandija, në cilësinë e zëvendëskryeministres dhe kryetares së “Task Forcës”.
Ndër të tjera raporti evidenton se pati shitblerje masive të votës edhe me burime të paligjshme parash, aq sa ndikoi në rënien e vlerës së euros menjëherë pas marrëveshjes Rama-Basha deri dy ditë pas zgjedhjeve; se grupe kriminale mbështetën partitë e mazhorancës në zgjedhje; se punonjës të Policisë së Shtetit mbështetën qeverinë në bashkëpunim me elementë kriminalë dhe se administrata e fondet buxhetore u përdorën në fushatë.
Raporti përmend 3.600 lëvizje në kundërshtim me ligjin në administratë gjatë fushatës. Në raport, përmenden emrat e institucioneve dhe personave që konsiderohet se kanë shkelur ligjin zgjedhor, apo ligje të tjera të standardeve për zgjedhjet, por në të shumtën e rasteve, raporti thotë se nuk janë verifikuar nga policia, ose kanë mbetur pa përgjigje.
Për shembull, në raport thuhet se ministrat teknikë kanë dërguar në Prokurori rreth 110 raste për krime zgjedhore, ndërsa policia ka proceduar vetëm 69 nga 484 denoncime të përcjella nga Ministria e Brendshme.
Në raport thuhet se “Task Force” nuk iu vunë në dispozicion mjetet e nevojshme financiare apo logjistike për të kryer një proçes real monitorimi. /tesheshi.com/
