Kërkesa globale për energji për frymë do të arrijë kulmin në vitin 2030 falë teknologjisë së re dhe politikave më strikte të qeverive, parashikon Këshilli Botëror i Energjisë.
Në një raport që fokusohet mbi disa skenarë për përdorimin global të energjisë, grupi i akademikëve, kompanive energjetikë dhe trupave të sektorit publik, parashtrojnë një “botë thelbësisht të re për industrinë e energjisë” duke e cilësuar atë “tranzicioni i madh”.
Raporti, publikuar përpara kongresit botëror të Energjisë që mbahet në Stamboll, parashikon se kërkesa për energji për person – përfshirë këtu edhe karburantet për transport, ngrohje dhe elektricitet – do të nisë të bjerë pas vitit 2030.
Ged Davis, kreu ekzekutiv për Këshillin botëror të Energjisë thotë: “Historikisht, njerëzit kanë folur për kulmimin e naftës por tashmë trendet që po shfaqen po i drejtojnë ekspertët të marrin në konsideratë pasojat e kulmimit të kërkesës”.
Por, ndërsa kërkesa e përgjithshme për energji do të nisë të bjerë, kërkesa për elektricitet do të dyfishohet deri në vitin 2060, thotë ky këshill, duke kërkuar investime më të mëdha në infrastrukturë në sisteme smart që promovojnë efikasitet energjetik.
Rritja “fenomenale” e energjisë së diellit dhe erës parashikohet të vazhdojë, ndërsa përdorimi i qymyrit dhe naftës do të zbehen në këtë spektër miks të burimeve energjetike. Energjia e përftuar nga dielli dhe era llogariten se gjeneruan 4 për qind të energjisë në vitin 2014, por rezervat e tyre do të rriten deri në 39 për qind deri në vitin 2060, ndërsa pritet gjithashtu të jetë në rritje energjia e prodhuar nga uji dhe energjia bërthamore.
Karburantet fosile do të mbetet burimi numër një i energjisë, me një rënie vetëm prej 5 për qind që nga viti 1970: nga 86 për qind të furnizimit në 81 për qind në vitin 2014.
Këshilli hartoi tre skenarë për të vlerësuar aspekte të ndryshme të përdorimit të energjisë. Të gjithë skenarët parashikojnë përdorimin e karburanteve fosilë nga 50 deri në 70 për qind si burim energjie, deri në vitin 2060, thotë këshilli që përbën trupën e akredituar nga OKB në fushën e energjisë globale.
Sipas dy prej skenarëve, prodhimi i naftës do të kulmojë në vitin 2030 midis 94 milionë fuçive në ditë dhe 103 milionë fuçive në ditë, edhe pse një skenar i tretë e parashikon kulmin dhe platen prej 104 milionë fuçi në ditë brenda një dekade pas 2014-ës.
Këshilli thotë se kalimi nga makinat me naftë tek teknologjitë më të lira si mjetet elektrike do të provohet të jetë “një nga pengesat më të vështira për t’ua tejkaluar” në përpjekjen për të dekarbonizuar përdorimin global të energjisë.
92 për qind e mjeteve punuan nga nafta në vitin 2014, por kjo shifër pritet të bjerë në 78 deri në 60 për qind ndërsa makinat elektrike po bëhen gjithnjë e më popullore.
Por, këshilli paralajmëron se mbajtja e ngrohjes globale nën nivelin 2 gradë Celsius do të kërkonte “një përpjekje të jashtëzakonshme dhe të vazhdueshme, shumë përtej asaj për të cilën janë marrë tashmë angazhime dhe me çmime shumë të larta të karbonit”.
Parashikimet e këshillit për emetimin e karbonit variojnë shumë varësisht nga fuqia e përpjekjeve për të mbajtur nën kontroll problemin. Ato flasin për një reduktim me 61 për qind deri në vitin 2016 deri tek një rritje e lehtë me 5 për qind.
Përgjithësisht, tema e raportit për tranzicionin e madh mban parasysh rritjen më të ngadaltë të popullsisë, teknologjitë e reja radikale, sfidat më të mëdha mjedisore dhe një zhvendosje të pushtetit ekonomik dhe gjeopolitik.
Raporti i vitit të kaluar paralajmëronte për kërcënimin e rrjeteve globale të energjisë nga moti ekstrem që shoqëron ngrohjen globale.
Përgatiti: Juli Prifti – /tesheshi.com/
