Nga Mark Brunga
Para disa ditësh u arrestua nga grupi i antiterrorit në fshatin Rakull të Komunës së Syneit në rrethin Kavajës, një i dyshuar si ekstremist – islamik, siç thuhet rëndom – i quajtur Alban Elezi. Sipas policisë, nga hetimet dyshohet se ky person është pjesë e një grupi rekrutuesish zinxhir që çonte persona në Siri për llogari të ISIS-it.
Ai është arrestuar – siç deklarohet nga policia shqiptare – pas urdhërarrestit të lëshuar ndaj tij nga Gjykata e Breshias në Itali. Arrestimi ka bërë bujë në një fshat relativisht të qetë, ku dhe i dyshuari Elezi, është njohur si një person me halle të shumta familjare pasi kishte 5 fëmijë dhe punonte kryesisht në ndërtim si hidraulik dhe elektriçist.
Ndërkohë ai kishte një vëlla që banonte në Itali, i cili ishte i martuar me një grua italiane me besim katolik, e që quhej Kristina.
Ndërsa bashkëshortja e tij – siç mësohet nga banorët e fshatit – ishte nga Dragostunja e Librazhdit, një fshat me nam për numrin e madh të besimtarëve ndër banorë. Por thuhet gjithashtu se një kunat i tij, vëlla i gruas, kishte qenë me studime në Siri e është vrarë në konfliktin e atjeshëm në moshën 20-vjeçare.
Për arrestimin e Elezit, kanë shkuar në mëngjes në fshat rreth 50 forca policie të antiterrorit dhe e kanë gjetur në gjumë.
Rreth kësaj ngjarjeje, Përparim Çaça Kryetar i Komunës Synej, tha në një intervistë i gjithë komuniteti i zonës është habitur nga lajmi, pasi Elezi ka qënë një njeri mjaft komunikues dhe me sjellje korrekte. Njihej si njeri shumë i mirë dhe si besimtar, i cili shkonte çdo ditë në xhaminë e fshatit Rrakull.
Sipas asaj çfarë tha kryekomunari, por dhe banorët, ai ishte besimtar i përkushtuar, kishte shoqëri të mirë, si dhe ishte nga një familje shumë e rregullt në marrëdhënie me bashkëfshatarët.
Për të mbajtur familjen ai punonte në ndërtim, kryesisht hidraulik, me shokë shumë normalë. “Kjo që ka ndodhur na duket mosbesuese sepse e njohim familjen e tij dhe rrethin e tij”, thonë bashkëfshatarët.
Bashkëjetesa fetare
Çaça tregon një detaj interesant: fshati Rrakull ka qënë dhe fshati i fundit ku është ngritur para disa kohësh xhamia. Emri i fshatit dikur ka qenë Shëngjergj.
Pasi në kohët e mëparshme ka qënë një vendbanim krejtësisht kristian.
Ky fshat ose ky komunitet, nuk ka pasur asnjëherë personazhe radikale. Vëllai i Albanit ka qënë i martuar me një katolike italiane dhe mbesa e tij kishte emër kristian. Kjo tregon akoma më shumë sipas Çaçës, se në këtë mjedis bashkëjetese fetare, ka pak gjasa që ai të ndërmerte veprime radikale.
Vasip Tatani Kryeplak i fshatit Rrakull thotë se lajmi që morrën për arrestimin e Alban Elezit, i ka hidhëruar të gjithë.
“Pasi ne e dimë të gjithë, thekson ai, se ai është nga një familje e mirë dhe e respektuar, që është sjellë gjithmonë mirë. Se çka bërë, ne nuk e dimë atë e di shteti, por këtu është një familje e respektuar nga të gjithë banorët e fshatit Rrakull. Në dijeninë tonë tani për tani ai nuk ka qënë as jashtë shtetit. Familja e tij është një familje që merret me blegtori dhe ekonominë e zakonshme bujqësore në një fshat. Vetë punonte në ndërtim mbas ustallarëve. Herë elektriçist e herë hidraulik. Ka punuar vazhdimisht dhe unë e shikoja nga dyqani im vazhdimisht duke shkuar e ardhur nga puna”, tregon kryeplaku.
Luftim Elezi, kushëri i të arrestuarit, tregon se janë habitur me arrestimin e Albanit. Dhe as e mendojmë kurrë që ai të jetë marrë me gjëra të tilla.
“Sepse gjatë gjithë kohës ai ka qënë në kontakt me banorët e zonës dhe të afërmit. Besimtar ishte. Erdhën dhe e arrestuan në shtëpinë e vet dhe në mënyrën më brutale. Nga sa më tha një shoku i vet, kanë qënë të paktën 50 policë që e kanë terrorizuar gjithë shtëpinë. Mendoj se akuza për të është absolutisht e pavërtetë, sepse e kanë parë të gjithë fshati ne punë e shtëpi dhe s`është marrë me gjë tjetër. Unë e them këtë me siguri”, thotë Luftimi, duke shtuar se me të ka pirë kafe gjatë gjithë kohës.
“Dhe shumë shpesh kemi punuar edhe bashkë, unë murator e ai elektriçist. Dhe s`më ka shprehur asnjëherë asgjë që ka të bëjë me luftrat, në Sirinë, ISIS-in a ku e di çfarë. Prandaj them me siguri se për mendimin tim, kjo akuzë është e pavërtetë. Ai në Itali ka qenë vetëm para 2 viteve tek vëlla i vet”, shton Luftimi.
Jo përgjithësisht, port pothuajse absolutisht, komuniteti i zonës nuk pranon që bashkëfshtari i tyre ,Alban Elezi, të ketë lidhje me ekstremistët e ISIS-it. /tesheshi.com/
