Nga Gjergji Koja
Edi Rama dhe Lulzim Basha kanë hyrë secili në mandatet e dyta, i pari si kryeministër dhe tjeëri si kryetar i PD-së. Gjatë 4 viteve në mandatin e parë dy drejtuesit e partive kryesore në vend kanë pasur një seri përballjesh, akuzash dhe kundërakuzash, ndërsa në muajt e fundit, edhe me ndërhyrjen e ndërkombëtarëve, u vendos paqja me nënshkrimin e marrëveshjes së 17 majit. Por përsa kohë do të vazhdojë ky raport i ri politik, që provën e parë kishte zgjedhjet e 25 Qershorit? Këtë askush nuk mund ta thotë me siguri, përsa kohë pritet sjellja e palëve në legjislaturën e re të Kuvendit të Shqipërisë.
Për herë të parë, në sallën e parlamentit me pozicionet që kanë aktualisht do të jetë Lulzim Basha dhe Sali Berisha. Hera herës është aluduar se Berisha është kryetari real i PD, ndërsa Basha ka tentuar të shfaqet kudo si vendimmarrës, madje morri përsipër edhe hartimin e listave të kandidatëve për deputet, megjithëse pak minuta përpara publikimit të tyre u raportua një takim me ish-kryeministrin në zyrën private të tij. Gjithsesi salla e Kuvendit mund të hedhë më shumë dritë mbi protagonizimin, pra nëse Berisha do të pranojë ose jo që kreu i partisë së tij i rikonfirmuar më 22 korrik në mandatin e dytë, të mbajë peshën kryesore të debateve, duke lënë disi në hije ish-kryeministrin.
Në legjislaturën që tashmë është mbyllur, Berisha mbajti pothuajse gjithë peshën e debatit, ishte ai që fliste me orë të tëra në çdo seancë, që debatonte me kryeministrin, ministrat dhe çdo deputet socialist, duke mbushur boshllëkun që krijohej nga mefshtësia e grupit parlamentar që kishte caktuar vetë në 2013.
Tashmë në legjislaturën që do të nisë në shtator nuk dihet nëse Berisha do të luajë sërisht atë rol, duke lënë në hije edhe Lulzim Bashën, apo do të ketë një tërheqje taktike, duke lejuar kreun e PD të ketë mbi supe gjithë përballjet politike.
Në anën tjetër, Rama në mandatin e dytë si kryeministër ka fituar një eksperiencë dhe pjekuri mbi sallën e Parlamentit, debatet, akuzat dhe ndoshta në këtë 4 vjeçar do e ketë më të lehtë për të përballuar një luftë politike që mund të jetë në dy fronte, PD dhe LSI. Por problemi i vetëm që mund të ketë kryeministri, i cili duket se ka një grup parlamentar të bindur dhe të paktën 3 deputetë të tjerë që janë të gatshëm të ngrenë kartonat pro tij, është se përgjegjësinë për çdo vendimmarrje në ekzekutiv dhe kostot që sjellin ato nuk mund t´I ndajë me të tjerë. Ai sot ka timonin, makinën, pasagjerët dhe gjithçka tjetër që kërkoi gjatë fushatës elektorale.
Përballja Rama1-Basha1
Lulzim Basha dhe Edi Rama gjatë mandatit të tyre të parë në postet respektive kanë pasur disa përballje, qofshin elektorale apo mbi çështje të politikës.
Fitorja më e madhe e Bashës në raport me kundërshtarin e tij politik është dekriminalizimi. Kreu i PD-së arriti të bindë ndërkombëtarët se Shqipërisë i duhet një ligj kundër përfshirjes së personave me preçedentë kriminalë në politikë dhe pavarësisht kundërshtive detyroi mazhorancën e majtë të miratojë një draft që i hoqi mandatin e deputetit disa prej ligjvënësve socialistë.
Por në 4 vjet një fitore është shumë pak për liderin e një partie që pretendonte të merrte qeverisjen e vendit. Basha humbi përballjen për reformën territorial, duke lënë PD jashtë çdo diskutimi dhe vendimmarrjeje. Më pas ai u shfaq shumë keq në sytë e ndërkombëtarëve në lidhje me reformën në drejtësi, ndoshta jo direkt për fajin e tij, por si lider zyrtar që është, përgjegjësia binte pikërisht mbi të. Gjithsesi Basha deklaroi fitoren mbi këtë çështje referuar faktit se disa nga draftet që hartoheshin pa praninë e opozitës ose me kundërshtinë e saj rrëzoheshin nga Venecia. Në fund, PD hyri dhe miratoi gjithçka kishte lidhje me drejtësinë, ashtu sikundër kishte deklaruar disa herë publikisht Edi Rama.
Beteja tjetër ishte ajo për zgjedhjet kur PD deklaronte se nuk hynte në një proçes me Ramën kryeministër, ndërsa ky i fundit ripërsëriste togfjalëshin që do të hyjnë dhe në fakt pati të drejtë.
Këto ishin disa nga përballjet, për të cilat bilanci duket se favorizon Ramën. Por në proçeset elektorale, kryeministri duket tërësisht i avantazhuar në raport me kreun e PD-së. Nga momenti që Basha u zgjodh në krye të opozitës më 22 korrik të 2013 dhe deri në 25 qershor të 2017 në Shqipëri janë zhvilluar 9 proçese zgjedhore, të pjesshme lokale dhe të përgjithshme. Nga 9 përballjet, Basha rriti të fitojë vetëm 1, zgjedhjet në Bashkinë e Kavajës që u zhvilluan në të njëjtën ditë me ato parlamentare. Pavarësisht akuzave se votat u blenë, u shitën apo vullneti u deformua, bilanci mbetet po aq, 8-1 në favour të Edi Ramës.
Tabela mëposhtme tregon qartë diferencat e votave mes PS dhe PD, që nisin me zgjedhjet e pjeshme të mbajtura më 1 shtator 2013 dhe përfundojnë më 25 qershor të 2017. /tesheshi.com/
