Në një konferencë për shtyp Rama – Zaev gjatë një vizite të këtij të fundit në Tiranë, largimi i opozitës shqiptare nga parlamenti ka zënë një vend qëndror në deklarata.
Ka qenë vetë kryeministri maqedonas ai që i ka kujtuar opozitës se ai vetë, edhe pse në opozitë deri para pak muajsh, nuk ka vepruar për të penguar proceset integruese, siç aludohet me aktet e PD-LSI.
“Unë si Zoran Zaev nuk isha në opozitë para 100 vjetësh. Janë thjesht 21 muaj më parë kur isha në opozitë, por nuk lejuam të japim përshtypjen para evropianëve se jemi kundër fillimit të bisedimeve të vendit tonë me BE-në. Ne jemi miq të të gjithë qytetarëve të Shqipërisë dhe i dëshirojmë të mirat popullit shqiptar. Vijmë si miq dhe japim mesazhin paqësor që nëpërmjet dialogut të kenë zgjidhje”, tha Zaev.
Nga ana tjetër, kryeministri Rama, duke bërë një lidhje mes asaj çfarë ndodhi kohë më parë në Maqedoni e kësaj që po ndodh sot në Shqipëri, ku aludohet se ka një “dorë ruse”, ofroi këtë arsyetim: “Rusia nuk është vend tifoz i BE-së i zgjerimit të BE-së dhe natyrshëm s’mund të ketë tifozllëk për ecurinë evropiane për asnjë prej vendeve të Ballkanit Perëndimor. Kjo nuk është sekret, kjo dihet. Ndërkohë ne kemi një axhendë kombëtare, kryefjalë e së cilës është të bashkohemi në familjen evropiane. Sa herë që kjo axhendë cënohet, aq herë kush nuk është tifoz i Evropës, i BE-së, i integrimit të plotë të Shqipërisë dhe Ballkanit Perëndimor, pa diskutim që sheh një oportunitet”, tha Rama. /tesheshi.com/
