Kontrolli i Lartë i Shtetit, institucioni që drejtohet nga një ish-figurë e PD-së, ish-ministër i Berishës, Bujar Leskaj, është sulmuar për herë të parë nga kryeministri Edi Rama, ndonëse asnjëherë në tre vjet qeverisjeje të tij, KLSH në asnjë çast nuk është kontestuar apo përfolur politikisht.
Gjatë një interviste në Kapital të gazetarit Aleksandër Furxhi, në Vizion Plus, Rama e quajti KLSH si një zyrë financash të PD-së, kjo pasi u pyet rreth raporteve të këtij institucioni që reflektonin abuzime të mëdha me fondet publike në këto tre vjet nga ana e zyrtarëve të shtetit.
Dhe krisja duket se ka ardhur që nga momenti kur KLSH çoi në Prokurori ministrin e Energjitikës, Damian Gjiknuri në lidhje me proçedurat e marrëveshjes me ÇEZ.
Megjithatë, Rama nuk ka ndërmarrë asnjë hap për të ndryshuar kreun e Kontrollit të Lartë të Shtetit.
Në kohën kur drejtonte Bashkinë e Tiranës, pika më e fortë e Ramës ishin raportet e auditit të KLSH-së, të cilat paraqisnin performanca pozitive në menaxhimin e fondeve. /tesheshi.com/
