Në mesin e krizës së koronavirusit, politika shqiptare ka rifituar konturet e saj të zakonshme. Kjo për shkak se opozita pretendon se qeveria po tenton të fsheh shifra të infektuarish, apo se nuk po bën teste të mjaftueshme.
Kryeministri Rama iu përgjigj së fundi duke sqaruar se testimet nuk i vendos ai por specialistët e “vijës së zjarrit”.
“PD s’mund të japë mend as për tabelën e shumëzimit, jo më për strategjinë e testimit! Strategjia e testimit është detyrë e Komitetit Teknik që udhëheq luftën në vijën e zjarrit. Detyra e politikës, qeverisë a opozitës është të dëgjojë dhe mbështesë ekspertët. Të tjerat janë 7×7=42”, shkroi Rama.
Por Basha, duke hedhur dyshime te bluzat e bardha, ajo pjesë që merret posaçërisht me menaxhimin e situatës, pretendon se ato po përdoren nga shefi i qeverisë.
“KM po fshihet pas një komiteti teknik, me shpresë që njerëzit mos ta shohin se sa i papërgatitur është. Është përgjegjësi e qeverisë që të mbrojë shëndetin e njerëzve, të pajisë me mjetet e duhura ekipet mjekësore dhe të mbajë në këmbë ekonominë”, shkruan kreu demokrat.
Kujtojmë se ky rikthim i gjuhës së rënduar politike, erdhi pas famës edhe ndërkombëtare të fituar nga Rama, pas dërgimit në Itali të 30 mjekëve dhe infermierëve në shenjë solidariteti. /tesheshi.com/
