Kryeministri Edi Rama, ka deklaruar se në shtator nuk do të ketë më dy dogana mes Kosovës dhe Shqipërisë, por gjithçka do të përpunohet vetëm në një vend dhe procedurat do të zgjasin 5 minuta, ngaqë çdo të gjë do të jetë dixhitale.
Në një konferencë shtypi përpara pushimeve verore, Kreu i qeverisë deklaroi se në pikën e Morinës do të përpunohen mallrat që vijnë nga Kosova apo dhe shkojnë në Kosovë, duke mos ketë kështu vonesa dhe zgjatje procedurash.
Në lidhje me ndryshimet qeveritare, Rama nuk ka folur për rikonfigurim kabineti por pyetjes a do t’i bëhet refresh qeverisë? Kryeministri iu përgjigj: Të freskohen njëherë ministrat.
Një tjetër qëndrim i rëndësishëm në konferencë ishte se Rama deklaroi se nuk dop të shkojë brenda vitit në Greqi, gjë që tregon nivelin e vështirë të marrëdhënieve Tiranë-Athinë dhe deklaroi se e ka ftuar Tsiprasin të vijë në Tiranë në kohën kur ai e shikon të mundshme. Rama theksoi se ajo pjesë që u mor nga grekët në marrëeveshjen detare të hedhur poshtë nga Kushtetuesja i përket Shqipërisë ndaj nuk do të ketë asnjë lëshim. Nëse nuk biem dakord tha Kryeministri, këtë do ta zgjidhë një palë e tretë.
Thelbi i konferencës së shtypit ka qenë ekonomia, e cila sipas Ramës po përjeton një kthesë që sjell një model të ri: pra rritje të eksportit të makinerive, shtim të prodhimit, rritje e mbjelljes në bujqësi, të cilët do të përkthehen shumë shpejt në ekonomi prodhuese dhe jo konsumuese.
“Ekonomia u mbyll me rritje 2.82% në fund të 2014-s. Ndërsa në fund të 2015 do të jemi pranë rritjes prej 3 për qind”, ka deklaruar Rama.
Kreu i qeverisë ka nënvizuar se, shlyerja e 641 milionë dollarë borxhe ndaj kontraktorëve ka pasur një impakt direkt në konsolidimin e trendit pozitiv.
“Ky qe një proces me ankesa për korrupsion zero, pasi metoda e përdorur, duke shlyer detyrimet në bazë të një radhe të papërcaktuar nga qeveria dhe dëshirat e Ministrisë së Financave, por e caktuar nga koha e krijimit borxheve ka garantuar që procesi të jetë i pakontestueshëm”, ka thënë Rama.
Për 6-mujorin e parë të këtij viti, ka shtuar Rama, kemi një ulje të borxhit nën 69 për qind, në 68.2 për qind.
“Duke marrë parasysh edhe shlyerjen e detyrimeve ndaj kontraktorëve, niveli real i borxhit është 64 për qind”, theksoi Rama.
Kryeministri deklaroi se, paketat fiskale kanë ardhur me masa lehtësuese, të cilat kanë dhënë një efekt prej 97 milionë dollarësh në buxhetin e shtetit.
Një tjetër arritje sipas kryeministrit kanë qenë edhe rimbursimet automatike të TVSH-së, që kanë eleminuar sipas tij zvarritjet.
Kryeministri deklaroi se në shtator do të nisë një aksion i madh tek bizneset për të luftuar evazionin fiscal. “Kush nuk paguan do të shkojë në gjykatë i ndjekur penalisht”, tha Rama duke apralajmëruar një “furtunë të re”.
/tesheshi.com/
