Kryeministri Rama ka folur sërish për projektin e Sazanit, aty ku dhëndëri i Trump-it, Jared Kushner, nëpërmjet fondit saudit, pritet të investojë miliona në një oaz turistik modern.
“Ideja e këtij projekti ka lindur para se unë të bëhesha kryeministër. Unë di që sot kemi në tavolinë një ofertë fantastike që do ta shqyrtojmë sipas ligjit. Ne do ta shqyrtojmë si përfaqësues e denjë të popullit shqiptar që nuk negociojnë interesa personale, por interesat e publikut në çdo hap siç kemi bërë me portin e Durrësit ku publiku është pjesë e atij investimi”, tha Rama pas një takimi në selinë rozë me drejtues politikë të qarqeve.
Gjithsesi, ai tha se një projekt i tillë as nuk imagjinohej vite më parë, duke theksuar se pasuron shqiptarët dhe rrit ekonominë e vendit.
Rama tha se projekti është ende në fazë shqyrtimi dhe do të negociohet pjesëmarrja e shtetit në atë investim.
“Do fitojnë çka nuk imagjinohej vite më parë. Nxitja e këtyre zhvillimeve pasuron shqiptarët, pasuron Shqipërinë, rrit ekonominë, sepse turizmi është një industri që stimulon zinxhirin e prodhimit, pasi të huajt që vizitojnë Shqipërinë konsumojnë këtu, konsumojnë ça prodhojnë bujqit dhe fermerët, konsumojnë ça iu ofrojnë të gjithë ata që janë në shërbim, konsumojnë ato që zinxhiri i shërbimeve krijon. Shqipëria sot për fatin e mirë të të gjithëve dhe për fatin e keq të mendjeve të sëmura, është komplet në nivel tjetër. Deri para disa vitesh ky projekt do ishte i paimagjinueshëm. Diskutojmë për eksperiencën e turizmit botëror që kërkon të hyjë në Shqipëri. Flasim për një Shqipëri që behet konkurruese me luanët e Mesdheut, Greqinë e Kroacinë”, tha Rama.
