Kryeministri Edi Rama e ka shpjeguar dhe mbrojtur në një mënyrë shumë popullore marrëveshjen e arritur mes tij dhe kreut të opozitës, Basha e cila çoi dhe në votimin e vetingut. Sipas tij, kjo është arritja më e madhe dhe, për këtë ia bën hallall PD-së 6 ministri të marra prej saj, në bazë të marrëveshjes.
“Kur më thonë që lëshove shumë se morën shumë ministra, me ato që fiton Shqipëria hallall ministrat deri në 25 qershor”, tha shefi i qeverisë duke patur parasysh pikërisht miratimin e vetingut.
“Mbrëmë arritëm të votojmë vetingun. Shumica shprehej mos ta vëmë në program se nuk e realizojmë dot. Por unë isha nga ata që insistonin do ta vëmë në program dhe do ta realizojmë. Unë i besoj asaj që njeriu duhet të përpiqet për të realizuar ato që dëshiron. Dhe kjo është përpjekja dhe angazhimi ynë për të ndryshuar sistemin gjyqësor në vend, duke e pastruar nga gjyqtarët dhe prokurorët e korruptuar”, theksoi Rama.
Por sipas tij, ka dhe një arritje tjetër në bazë të marrëveshjes e cila çoi në dorëzimin e 6 ministrive te kundërshtari: mbyllja e gojës në rast humbjeje në zgjedhje.
“I futa në qeveri që më 26 qershor të mos thonë prapë na i vodhët, por të pranojnë rezultatin”,shtoi kreu i mazhorancës.
Deklarimet e Ramës u bënë gjatë një takimi të tij me gratë socialiste të Durrësit. /tesheshi.com/
