Kryeministri Edi Rama u takua sot me Kryeministrin serb Aleksandër Vuçiç, të cilit i bëri një ofertë pajtimi.
Rama i solli Kryeministrit serb shembullin e Gjermanisë dhe Francës, ndërsa i kërkoi atij që vendi ynë dhe Serbia të bëjnë për Ballkanin, atë që dy fuqitë e mëdha bënë për Europën.
“Serbia dhe Shqipëria duhet të shohin përpara duke bërë sëbashku për Ballkanin atë që Gjermania dhe Franca bënë pas Luftës së Dytë Botërore për Europën. Është e rëndësishme të kuptojmë të gjithë se Ballkani ka nevojë për Bashkimin Europian po aq sa BE ka nevojë për Ballkanin”,- tha z. Rama.
Biseda mes dy Kryeministrave u përqëndrua në projektet e përbashkëta të vendeve të Ballkanit Perëndimor, të cilat do të paraqiten në takimin e sotëm mes drejtuesve të këtyre vendeve dhe zyrtarëve të lartë të Bashkimit Europian.
Projektet më konkrete për të cilat dy Kryeministrat dhanë mbështetjen e tyre të plotë ishin autostrada Nish- Prishtinë-Durrës, hekurudha që do të lidhë Beogradin me Budapestin dhe autostrada Adriatiko- Joniane që lidh Shqipërinë me Malin e Zi dhe Kroacinë në veri dhe Greqinë në jug të vendit tonë.
Kryeministri Rama theksoi se marrëdhëniet mes Shqipërisë dhe Serbisë janë tejet të rëndësishme për stabilitetin dhe zhvillimin ekonomik e social të Ballkanit dhe Europës në tërësi.
Kryeministri Vuçiç shprehu mbështetjen e qeverisë serbe për projektet në fjalë dhe theksoi se “Bashkimi Europian duhet të kuptojë dhe mbështesë vendet e Ballkanit Perëndimor dhe mbështetja e projekteve në fjalë do të nxisë ekonominë e të dy vendeve”.
Kryeministri serb konfirmoi vizitën e tij në Shqipëri në fund të muajit maj, ku do të marrë pjesë në konferencën e SECP që do të zhvillohet në Tiranë./tesheshi.com/
