Kryeministri Rama tha se tre policët e rrëmbyer nga forcat serbe në territorin e Kosovës, duhen liruar pas nuk kanë kryer asnjë krim.
“Së pari është e menjëhershme nevoja dhe domosdoshmëria që të tre punonjësit e policisë së Kosovës të kthehen në shtëpi.
Përtej pretendimeve që janë kapur këtu apo kanë hyrë atje, apo janë kapur diku për të cilat KFOR-i nuk do të japë konkluzion publik por do të depozitojë dosjen përkatëse në NATO, është absolutisht e qartë që në të gjitha rastet tre efektivët nuk kanë bërë asnjë krim.
Edhe nëse do supozonim se kanë shkelur vijën e kufirit, ka vetëm një përgjigjie, kthimin e tyre në shtëpi”, arsyetoi kreu i qeverisjes shqiptare, duke vijuar sërish me çështjen e nxehtë të raporteve Kosovë-Serbi.
Sipas tij, ndërkombëtarët e kanë gati recetën e zgjidhjes së krizës, madje deri në njohje të ndërsjelltë.
“Zgjidhja e përbashkët është zgjidhja e ofruar nga bashkësia euroatlantike me pikat shumë të qarta dhe të palëvizshme për de-eskalimin. Ajo që është më e rëndësishmja për interesin tonë është që paqja është në tryezë.
Dokumenti i marrëveshjes është në tryezë dhe mundësia historike është në tryezë për të mbyllur një kapitull të gjatë dhe të dhimbshëm dhe për të hapur një kapitull të ri për të bërë Kosovën të njohur nga Serbia.
Ky moment është kaq i rëndësishëm sa të gjithë këto të tjerat janë produkt i një devijimi tërësisht të panevojshëm të fokusit. Fokusi është të bëhet paqja përfundimtare në tryezë.
Sot bashkësia euroatlantike i ka dhënë mundësinë e artë Kosovës, propozimi i BE dhe SHBA është gjëja më e mirë që mund t’i ndodhë Kosovës.
Mund ta them me plot gojën që ajo marrëveshje në tavolinë dhe kjo mundësi e artë në këtë moment, nuk do jetë aty përgjithmonë sepse situatat mund të ndryshojnë dhe mund të hyjmë në një tjetër kohë të gjatë në histori ku nuk do kemi zgjidhje”, tha Rama, pa dhënë detaje mbi “zgjidhjen e artë” që ai pretendon.
Në këtë rast, pyetja është: ndahet apo jo Kosova?
Deklarimet e Ramës u bënë gjatë një konference për media me homologun hungarez Viktor Orban, i cili po viziton Tiranën.
“Javën tjetër do kem një takim bilateral me Beogradin dhe shpresoj se kjo çështje deri atëherë do të zgjidhet”, u shpreh shkurt Orban nga ana e tij. /tesheshi.com/
