Kryeministri Rama ka deklaruar se mjekët specialistë që nga Tirana po shkojnë në rrethe për të ofruar shërbimin e munguar, do e vijojnë këtë ritual deri pas një viti. Gjatë një vizite në spitalin e Kukësit, Rama tha se Programi i Patronazhit e ka dhënë gjithsesi efektin e vet.
“Do shkoj Tirana në të gjitha spitalet ku ka nevojë për specialistë, sepse deri në janar të 2019 na duhet të bëjmë këtë gjë. Pastaj do vijnë mjekët specialistë që do të jenë full time çdo ditë. Pavarësisht nga ky fakt, të gjithë nevojat tashmë po përballohen dhe kjo është e rëndësishme. Të gjithë rastet kur mjekë specialistë të pranojnë të shkojnë në spitalet e tjera ku nuk ka specialistë, ne do të japim një bonus plus rrogës, që të marrin aq sa marrin kur shkojnë ditën e parë në Gjermani e Itali po qe se kanë fatin të gjejnë punë. Kjo po funksionon dhe patronazhi gjithashtu, sepse po ulet fluksi i njerëzve që vijnë në Tiranë”, u shpreh Rama.
Sistemi spitalor shqiptar është përfshirë në një krizë personeli, pasi mjekë e infermierë po largohen, sidomos drejt Gjermanisë. Situatë e rëndë është në spitalet e rretheve, ku mjekët specialistë pothuajse mungojnë tërësisht. Kjo ka bërë që qeveria të japë bonuse në paga, për t’i detyruar që nën tundimin e rrogës, nga Tirana të shkojnë drejt rretheve. /tesheshi.com/
