Kryeministri Rama ka nisur një raprezalje të re në kuadër të të bërit shtet, siç thotë ai. Radhën e ka sistemi shëndetësor, spitalet më saktë, një prej plagëve më të mëdha sociale në Shqipëri prej 27 vitesh.
Si fillim, Rama ka kërkuar largimin e vullnetshëm të të gjithë drejtuesve aktualë.
“Largimi juaj nesër nga detyra nuk është zgjidhje, por është fillimi i zgjidhjes. Çfarë autonomie spitalore mund të kemi ne nëse ne nuk kemi menaxhim spitalor, kapacitet për të patur autonomi menaxheriale? Spitalet janë ndërmarrje në fund të ditës, nuk janë stalla ku veterinerët ca lopë i shohin e ca jo. Ndaj dua të mirëkuptoni kërkesën time për të dhënë dorëheqjen tuaj”, ka shtuar Rama.
Sipas Ramës, gjendja e spitaleve është katrastrofike, mu për shkak të drejtuesve të tyre.
“Sot spitalet tona nuk janë pasqyrë e pastërtisë dhe higjenës. Kush e ka përgjegjësinë për këtë? E keni ju që jeni këtu, drejtuesit e spitaleve. Spitalet mbahen pis…”
“Është një plagë e trashëguar, por nga ana tjetër personelit tonë mjekësor nuk mund t’i mungojë gatishmëria për t’iu përgjigjur në kohë dhe me cilësi pacientit, sepse pacienti e meriton këtë. Nuk jemi 27 vjet mbrapa, jemi 270 vjet mbrapa. Kush e ka përgjegjësinë për këtë? E keni ju. Stafi drejtues ka përgjegjësinë e madhe të menaxhimit të burimeve njerëzore dhe për të marrë vendimet e duhura në kohë, për t’iu përgjigjur si duhet nevojave me etikë dhe dinjitet…”
Rama tha se ka ardhur koha e një reformimi të thellë të shërbimit spitalor, për ta shkëpur atë nga kthetrat e politikës, e për ta vënë në shërbim të njerëzve, me maksimumin e profesionalizmit. /tesheshi.com/
