Aleati kryesor i Ramës në qeveri, Lëvizja Socialiste për Integrim ka qenë sërish kritike në kulmin e aksionit të shpallur nga qeveria kundër evazionit.
As më pak dhe as më shumë, por numri dy i LSI-së, Petrit Vasili, jo vetëm që ka qenë skeptik ndaj operacionit që ka nisur ditën e djeshme, por ka shfaqur edhe pakënaqësinë për një qëndrim të ngurtë nga ana e mazhorancës.
“Historia e zbatimit në terren të nismave të mëdha, të gjera, në Shqipëri ka rezultuar jo në pak raste, pra nuk kanë qenë sporadik, e ku ka pasur edhe qëndrime të ashpra ndaj atyre që janë në kufinjtë e ligjit. Nganjëherë ka pasur pse jo edhe arrogancë dhe këto në vend që ta ndihmojnë, e dëmtojnë procesin. Këto eksperienca negative të së shkuarës sigurisht duhet të jenë një moment delikat, i cili duhet kontrolluar dhe monitoruar nga Ministria e Financave, që normalisht udhëheq aksionin”, tha Vasili për Vizion Plus.
Ky nuk është qëndrimi i parë i LSI-së në këtë aksion por i përsëritur disa herë si nga nënkryetari i grupit parlamentar të LSI-së në Kuvend, deputeti Përparim Spahiu, por edhe nga vetë kryetari i partisë më të madhe aleate të Ramës, Ilir Meta.
Ky pozicion thellon ftohjen PS-LSI, e cila siç e ka shkruar shpesh herë portal tesheshi.com muajin e fundit, ka ardhur në një gradë nën zero, edhe pse temperaturat janë të larta.
Shkurt, Edi Rama, është vetëm në këtë operacion që e cilëson thelbësor për qeverinë e tij. Vetë Rama sot ka qenë i shoqëruar nga drejtoresha e tatimeve në një dalje publike ku ka paralajmëruar se nuk do të tërhiqet mbrapsht.
“Nëse në Shqipëri sot po marrim një mesatare shumë të thjeshtë, pihen 1 milionë kafe dhe shishe uji në ditë dhe marrim një çmim shumë mesatar, me ulje, një mijë lekë (të vjetra), e dini sesa është shuma që shkon në drejtim të paditur në vend që të shkojë në Arkën e Shtetit, për t’iu kthyer individit si qytetar në formën e investimeve dhe të shërbimeve? Është 61 milionë dollarë vetëm nga kjo. Ku shkojnë këto 61 milionë dollarë? Këto shkojnë në drejtim të paditur dhe janë evazioni i madh, nuk janë thjesht e vetëm evazioni i vogël i kafes. Nga ana tjetër, edhe vetë të vegjlit kanë një interes në këtë rast që ta japin kuponin, sepse ulin barrën në të cilën përfshihen praktikisht bashkë me qytetarin për shkak të të mëdhenjve. Mirëpo duke ardhur tek pika fundore, ne praktikisht bllokojmë prurjet që vijnë nga burimet e mëdha të evazionit që janë kompanitë e mëdha, që janë furnizuesit e mëdhenj, që janë ata që tregtojnë me shumicë mallrat e vlerës, apo mallrat e konsumit të përgjithshëm”, tha Rama për mediat.
/tesheshi.com/
