Kryeministri Rama ka kujtuar vetëveten në Lëvizjen Studentore të Dhjetorit ’90, në kuadër të “Ditës së Rinisë”, një festë e shpallur më 8 dhjetor pak vite më parë nga PD kur qe në pushtet, në funksion të luftës politike me opozitën – PS-në sot në pushtet.
Duke e tejkaluar këtë detaj, Rama i ka kushtuar një dedikim kësaj dite, duke shkruar:
“30 VJET janë shumë në rrugën e një njeriu, por jo edhe aq në rrugën e historisë së një vendi e sidomos kur kjo është koha e kalimit nga një diktaturë ekstreme, në një demokraci funksionale.
Bëhen plot 30 VJET sot nga dita, apo më saktë mbrëmja e daljes së studentëve në rrugën pa kthim të daljes prej diktaturës.
Vite të jashtëzakonshme në jetën e shoqërisë sonë dhe një privilegj i jashtëzakonshëm të qenurit pjesë aktive e përpjekjeve përgjatë kësaj rruge, së bashku me nderin e madh të udhëheqjes së vendit në 7 vitet e fundit, pavarësisht thinjave të shtuara me një shpejtësi marramendëse në këto vite”, shkruan i pari i qeverisë.
Kujtojmë se në atë kohë, Rama qe ndër zërat më të fuqishëm të rebelizmit anti-komunist. Prej gjuhës së ashpër, e po aq pikante, ai u bë shpejt figurë qëndrore e lëvizjes, por po shpejt u përplas me Berishën, duke devijuar të jetë ndër emrat e PD-së, me arsyetimin se partia e parë anti-komuniste nuk mund të drejtohej nga një ish-sekretar partie. /tesheshi.com/
