Kryeministri Edi Rama ka këmbëngulur në të tijën se taksat janë ulur për pjesën më të madhe të popullsisë. Pasi i mëshoi kësaj në mbledhjen e asamblesë socialiste tre ditë më parë, ai sërish e ripërsëriti dhe në mbledhjen e grupit parlamentar këtë të hënë.
“Kemi garantuar që 97 për qind e shqiptarëve të kenë sot më pak taksa se në 2013”. Ndërsa investimet e huaja, sipas tij, kanë arritur një rekord historik. Por sa i përket deklaratës së dytë, Rama nuk përmendi konkretisht asnjë kompani të huaj investuese në Shqipëri që do shërbente si ilustrim fakti lançuar prej tij.
Ndërkohë, sa i përket taksave, perceptimi dominues është se ato janë rritur e jo janë ulur, dhe kjo për pjesën më të madhe të popullsisë.
Rama mbrojti reformat e nisura, duke thënë se ato do e japin e efektin pozitiv në kohë. Ai përmendi reformën fiskale, atë në sistemin energjitik, në ndihmën ekonomike dhe administratën publike.
Ndërsa për reformën në drejtësi, ai tha se nuk ka vullnet nga ana e opozitës për ta bërë realitet, dhe se ajo, me veprimet e saj po bëhet pengesë për këtë reformë.
“Sot pamë një tjetër fakt të zinxhirit të fakteve që e bëjnë më të qartë mungesën e vullnetit të PD për të bërë reformën në drejtësi në kohën e duhur dhe me gjithë thellësinë e nevojshme. Thirrjes tonë që të bëhet pjesë e Kuvendit, PD i është përgjigjur me thirrjen ‘merrni armët që të mbroheni nga reforma në drejtësi’”, ka deklaruar Rama. /tesheshi.com/
