Rama: jam gati për lëshime të tjera ndaj PD-së, ja vijat e kuqe ku nuk kalohet

Kryeministri Edi Rama ka deklaruar sot se është gati të bëjë lëshime ndaj opozitës, por duke i treguar asaj vijat e kuqe që nuk duhet të tentohen të preken gjatë negociatave.

“PD i ka braktisur pozicionet e mëparshme për reformën në drejtësi. Sipas tyre, opozita duhet të mbrojë sistemin nga kapja. Ne i kemi ofruar opozitës dy të tretat. Nuk ka perëndi që të kapë drejtësinë me një formulë të tillë, ku opozita ka pjesën e saj.

Kemi punuar dhe po punojmë për një zgjidhje që të përshtasë nevojat e përfshirjes substanciale të opozitës, sipas rekomandimeve të Venecias. Zgjidhja është e mundur për PD, nëse ajo lëviz nga pika e vendeve të rezervuara.

Shumica e cilësuar është vija e kuqe të cilën ne nuk do ta kapërcejmë dhe për të cilën nuk do të bëjmë kurrë një kompromis me PD. Nëse bëhet, unë nuk do ta votoj kurrë këtë reformë.

Ata që do të zgjidhen në këto instanca do të zgjidhen me shumicë të cilësuar. Ne nuk do ta kursejmë këtë shumicë të cilësuar”, deklaroi Rama.

Kryeministrika ftuar opozitën të kthehet në komision për të vazhduar procesin, “sepse nuk ka më asnjë orë për të humbur”, por ka dhënë edhe një paralajmërim.

“Por nëse opozita do të na detyrojë ta votojmë draftin të vetëm, ne do ta votojmë atë pa asnjë lëkundje”, ka shtuar kryeministri.

/tesheshi.com/