Kryeministri Edi Rama ka qenë i pranishëm në inaugurimin e një anije të re, e cila do të shtohet në portin e Durrësit dhe do të ketë destinacion Italinë. Vetë Rama e cilësoi këtë si një moment shumë të rëndësishëm transformimi, pasi, siç tha ai, nuk bëhet fjalë vetëm për ardhjen e një trageti të ri në shërbim të gjithë pasagjerëve shqiptarë apo italianë, por për hapjen e një kapitulli të ri të kërkuar me mundim në këtë periudhë të qeverisjes.
Nuk munguan as humori e batutat e Kryeministrit në këtë inaugurim. Ndërsa lajmëronte ditën kur do të nisë nga puna trageti, ai paralelizoi se ajo përkon me ditëlindjen e deputetit Taulant Balla, i cili ishte i pranishëm në inaugurim dhe nisi të buzëqeshë, bashkë me të tjerët.
Rama nuk la pa thumbuar as investitorët e pronarët e kompanisë, të cilëve u tha: “Do të keni përfitime nga Shqipëria se për përfitime keni ardhur jo për sevap. S’ju ka sjellë Vatikani por interesi ekonomik”.
Kreu i qeverisë shprehu bindjen se përfitimi do të jetë reciprok, ndërsa deklaroi se shqiptarët janë udhëtarë të paepur dhe pavarësisht nivelit jo të lartë ekonomik që kanë në raport me popujt e tjerë të Europës, janë populli që udhëton më shumë dhe që konsumon më shumë mesazhe se të tjerët.
“Këtë e dinë mirë kompanitë e telefonisë celulare. Në Shqipëri edhe barinjtë në majat më të thepisura po presin të futin 4G në celularët e tyre”,- tha ndër të tjera Kryeministri Edi Rama. /tesheshi.com/
