Kryeministri, Edi Rama, ka bërë vizitën e tij të tretë në Kinën komuniste me përpjekjen për të tërhequr vendin më të populluar të botës që të investojë në Shqipëri, siç kinezët kanë bërë në Bullgari dhe Serbi.
Rama ka marrë pjesë në samitin që qeveria kineze po zhvillon në qytetin e madh lindor Sushou, me shtetet e Europës Lindore dhe Qendrore.
Kina e shikon këtë pjesë europian si treg të saj por edhe si “stok” për të grumbulluar mallrat për t’i dërguar më pas në vendet e Bashkimit Europian.
Këtë strategji Kina e shikon si rigjallërim të “Rrugës së Mëndafshit” që është koridori oriental i tregtisë që në mesjetën e hershme e deri në shpikjen e motorit me djegje të brendshme furnizoi Europën me gjithçka vinte nga Lindja e Largët.
Si pjesë konkrete e kësaj strategjie është shkurtimi i rrugëve duke krijuar linjën nga Kina në Stamboll e më pas në Durrës, nga aty për në vendet e BE-së.
Por përveç Shqipërisë, në radhë janë edhe vendet e tjera të Ballkanit që synojnë të kthehen në “magazine” të mallit kinez.
Bullgaria për shembull ka një dendësi të madhe shkëmbimesh me Kinën dhe ajo e ka superioritetin në rajon. Hungaria është kthyer në një vend i preferuar nga Pekini. Kurse Beogradi është një aleat i ngushtë politik i Kinës që prej vitit 1972-shit, kur Enver Hoxha u prish me Teng Xsiao Ping-un, i cili lidhi urat e forta me Jugosllavinë e Titos.
Edi Rama ka premtuar në samit se qeveria e tij do t’i ketë prioritet marrëdhëniet me Kinën, duke kujtuar relacionet tradicionale kur kinezëria tek ne ishte ulur këmbëkryq, dhe udhëheqësit e dy vendeve nuk linin rast pa u puthur dhe ndukur para kamerave.
“Lidhja e qytetit Shantou, ku nis Rruga e Mëndafshit në Kinë, me qytetin e Durrësit, qyteti ynë i dytë më i madh, do të shtrojë rrugën për zhvillimin e portit të Durrësit, tha Rama.”
Kryeministri theksoi se është i nevojshëm identifikimi i perspektivave të reja ndërmjet 16+1, për të përkufizuar më mirë marrëveshjen shumëpalëshe midis Kinës, Europës dhe vendeve qendrore e lindore europiane.
“Axhenda që po aprovojmë do të shërbejë si udhërrëfyes për bashkëpunim të qëndrueshëm në të ardhmen. Duhet të identifikohen perspektiva sinergjike dhe masa të reja ndërmjet 16 + 1 dhe bashkëpunimit midis Kinës dhe BE-së, midis nismës Belt(Hekurudha) and Road(rrugë) dhe bashkëpunimit ndërkombëtar për të përkufizuar më mirë marrëveshjen tripalëshe midis Kinës, Europës dhe vendeve të Europës Qendrore e Lindore”, tha ai.
Rama kërkoi që kinezët të përfshihen në investimet e Korridorit të Kaltër dhe projekteve të tjera.
Të gjitha qeveritë shqiptare që prej 90-s i janë kthyer Kinës me një pasion të madh, duke ngulitur në tru se Pekini do të hedhë lekët si dikur me Enver Hoxhën kur ndërtuan Azotikun, e Fierit Superfosfatin e Laçit e të tjera, ndërsa ata gjigandë u kthyen për skrap për më pak se 10 vjet.
Sali Berisha, kur ishte Kryeministër, jo vetëm që priti thuajse të gjithë anëtarët e Byrosë Politike të Partisë Komuniste të Kinës, por edhe futi gjuhën kineze si prioritet. Dhe në fund iu ngjit në këmbë Murit të Madh me shpresë se do të impresiononte krerët e vendit më me shumë njerëz në botë.
Kjo politikë, është kthyer në një mani e çuditshme që duket sikur prioriteti i zhvillimit të Shqipërisë do të vijë nga malli kinez, që si për simbolikë lulëzon në zemrën e Tiranës, lagjen e Medresesë e cila është kthyer prej kohësh në një “China Town” ku blihet mall i lirë me cilësi jo të mirë…/tesheshi.com/
