Nga Hiroshima e bombës atomike amerikane dekada më parë, kryeministri Rama “goditi” Putinin në 1-vjetorin e agresionit në Ukrainë, duke iu referuar kërcënimeve bërthamore të presidentit rus.
I ndodhur për vizitë në Japoni, shefi i qeverisë shqiptare zgjodhi të përcjellë që atje një mesazh ndërgjegjësues mbi luftën dhe paqen.
“Kam nderin ta bëj këtë mesazh këtu nga Hiroshima pas një momenti të gjatë dhe jashtëzakonisht të veçantë nderimi në memorialin e të zhdukurve nga goditja e bombës atomike dhe pastaj në muzeun e tmerreve të bombës atomike.
Shtoj që të luash sot me fjalën bombë atomike sikur flet për kukulla, është vërtet një turp i civilizimit tonë dhe kjo e bën edhe më të rëndësishme mbështetjen për Ukrainën, aleancën e të gjitha vendeve demokratike dhe mbi të gjitha vendosmërinë e secilit që ka respekt për lirinë, vlerat e demokracisë në mënyrë që e shkuara të mbetet e shkuar dhe çdo përpjekje të dështojë”, tha Rama ndër të tjera në një mesazh edhe filmik. /tesheshi.com/
