Kryeministri Edi Rama zbuloi sot se ka një nismë të Presidentit Nishani për të ulur në tryezën e dialogut liderët e partive. Duke e bërë me dije këtë fakt, ai kërkoi që kjo të ndodhë sa më shpejt, duke zgjedhur kështu që ta faktorizojë kreun e shtetit në fund të mandatit të tij në funksion të zgjidhjes së krizës.
“Ka një nismë të Presidentit, që ne e kemi përkrahur pa ngurrim, jemi të gatshëm që të ulemi në tryezë pa kushte. Sikur ndodhi edhe më parë, përsëri ka një vonesë nga pala tjetër, që shpresoj mos jetë vonesë që paralajmëron dështimin”, u shpreh Rama në përfundim të seancës plenare.
“Është e rëndësishme që të gjithë ta kuptojnë që dialogu është preferenca e parë, koha nuk pret, PD dhe kryetari i saj nuk duhet të kenë frikë nga dialogu dhe tryeza ku partitë të shprehin pikëpamjet e tyre dhe këmbimi i opinioneve që mund të sjellë progres”, u shpreh më tej ai.
Një ditë më parë, Rama u shpreh se ishte i gatshëm të ulej me Bashën për të dialoguar dhe tek Presidenti. Ky i fundi është parë nga mazhoranca si një zgjatim PD-së gjatë ushtrimit të mandatit; por në kushtet e një ngërçi të pazakontë politik po merret në konsideratë si faktor nxitës dialogu mes palëve. /tesheshi.com/
