E ndërsa ka nisur punimet Forumi Ekonomik i Vjenës, i mbajtur këtë herë në Tiranë, ku marrin pjesë Kryeministrat e vendeve të rajonit, me përjashtim të atij grek, Aleksis Tsipras, i pari që ka marrë fjalën, ka qenë mikpritësi, kryeministri shqiptar, Edi Rama.
Ai ka theksuar se ëndrra e përbashkët e të gjithë popujve të rajonit është ajo Europiane dhe e futjes në BE.
“Rajoni po kalon një moment unik që ka nevojë për vendosmëri. Do të doja të theksoja se jemi këtu sëbashku jo vetëm se jemi engjëj ne dhe paraardhësit tanë kanë qenë djaj, por se të gjithë popujt tanë lidhen me një ëndërr të përbashkët që është Europa. Ne duhet të përballojmë me strategji lodhjen nga durimi dhe pritja e gjatë”,- tha Rama.
Në fjanë e tij, z. Vuçiç ra dakort me parafolësin Rama, duke u shprehur: “Më në fund ramë dakort për dy çështje shumë të rëndësishme, që është pikërisht rruga evropiane dhe anëtarësimi në BE. Kjo nuk ndodh sa hap e mbyll sytë. Ka disa gjëra që duhet të diskutojmë paraprakisht”.
Ai deklaroi se në Serbi i ka rënë pak popullariteti BE-së, dhe kjo ka ndodhur për shkak të pritjes së gjatë.
“Duhet të kujdesemi për veten, të kemi një treg, të punojmë bashkërisht dhe bashkë të dalim përpara institucioneve të BE-së dhe të kërkojmë ato që na duhen. Nëse nuk marrim mbështetje nga BE-ja të përpiqemi të bëjmë maksimumin vet”,- tha Vuçiç.
Kryeministri serb bëri me dije se i ka propozuar Edit, Milos që të firmosin bashkërisht disa projekte të përbashkëta dhe të shkojnë në Bruksel e tu kërkojnë atyre mbështetje për këto projekte, e në rast se nuk e marrin mbështetjen, mund të fillojnë punimet me investimet e tyre, për të krijuar një situatë më të mirë politike, tregje më të mira.
“Mendoj se iniciativat për shkëmbime që janë propozuar në vendin tonë do të jenë në gjendje të rrisim bashkëpunimin edhe mes rinisë, pasi vendet tona janë “eksportues” të rinisë. Serbia është e hapur për të gjitha proceset integruese në BE”,- tha ndër të tjera Vuçiç./tesheshi.com/
