Pas miratimit të ligjit të vettingu-ut, që në fakt është dhe kolona vertebrore e reformës në drejtësi, kryeministri Rama u shfaq shumë euforik pasi doli nga salla e parlamentit, duke deklaruar se të korruptuarit morrën një mesazh të fuqishëm: “I bie që sot kasta e të korruptuarve dhe të inkriminuarve në drejtësi ka marrë mesazhin e qartë, sikundër shqiptarët kanë marrë një tjetër konfirmim të vullnetit të patundur të kësaj shumice për t’i dhënë këtij vendi drejtësinë e munguar e të mohuar për kaq shumë vite dhe për t’i dhënë fund një historie të turpshme që ka njollosur keq Shqipërinë dhe ka demoralizuar qytetarët për vite të tëra: drejtësisë që shitet e blihet si mall”.
Ndërsa sa i përket mosvotimit nga ana e opozitës, e për më tepër largimit të saj nga salla në momentin e hedhjes në votim, Rama tha se “Kjo shumicë, e cila i kishte votat, e priti opozitën deri në fund, pranoi të negocionte e modifikonte me të çka ishte e modifikueshme pa shkelur vijat e kuqe, deri në fund kemi qenë të gatshëm për të bërë çdo gjë për ta bërë bashkë. Por opozita ka bërë atë që di të bëjë gjithmonë, të bëjë sikur do por që nuk do”, ka shtuar Rama.
Ndërkaq, opozita ka paralajmëruar se do e çojë ligjin e vettingu-t në Gjykatën Kushtetuese, pasi pretendon se në të ka shkelje kushtuetuese. /tesheshi.com/
