Ashtu si premtoi një ditë më parë se do të nxirrte të vërtetat dhe të pavërtetat e trafikut të drogës në Shqipëri, kryeministri Rama shfrytëzoi publikimin e rezultateve të aksionit kundër narkotrafikut për të “larë” llogaritë me opozitën.
Edhe pse nuk përmendi emra konkretë, Rama tha se në akuzat e opozitës nuk luhet vetëm politikë, por janë prishur interesa në trafikun e drogës. “Janë miliarda që deri dje shkonin diku, sot nuk shkojnë më”, vuri në dukje Rama, duke e cilësuar opozitën si të lidhur “kokë e këmbë” me industrinë e këtij aktiviteti kriminal.
“Ka një përputhje tragjike midis sasisë së rezultateve dhe sasisë së baltës. Sa më shumë vendet, policitë e ndryshme në të gjithë globin, drejtues të tyre janë përpjekur të luftojnë dhëmbë për dhëmbë me këtë industri kriminale, aq më shumë është rritur sasia e baltës nëpër media, nëpër parlamente, pse? Të jetë thjesht politike? Ka plot rrugë të tjera për të bërë betejë politike. Kjo nuk është vetëm politike, sepse në shifrat e ekspozuara nga ky operacion flitet për rrënjë, hektarë, sasira droge, por ato përkthehen në euro. Janë miliarda që deri dje shkonin diku, sot nuk shkojnë më. Ky është një operacion që ka prekur interesa”, deklaroi Rama
Kryeministri caktoi si detyrë të policisë të mos dëgjojë asnjë nga ata që baltosin punën e saj.
“Sepse nëse fiton ky perceptim, gjithmonë fiton pala që ka më pak të drejtë, është e provuar historikisht, makinat e baltës për këtë janë ngritur. Duke pasur një eksperiencë të gjatë në këtë aspekt sa më shumë dëgjon aq më shumë lëndohesh dhe dekurajohesh”, tha Rama.
Për kryeministrin, aksioni i policisë tashmë është i vlerësuar pasi ka marrë edhe vulën e dy partnerëve, duke iu referuar dy ambasadorëve që, sipas tij, u përfshin drejtpërdrejtë në emër të shteteve të tyre në këtë përpjekje.
“Nuk besoj se ishin gënjeshtra dhe nuk besoj të fusin ambasadorin amerikan tek ligji për dekriminalizmin”, përfundoi kryeministri. /tesheshi.com/
