Kryeministria ka bërë sot një thirrje të hapur për kandidimin e të interesuarve në pozicionet e anëtarëve të Këshillit të Statistikave.
Në njoftimin e Kryeministrisë thuhet se “në mbështetje të ligjit nr.9180, datë 5.2.2004, “Për statistikat zyrtare”, të ndryshuar, dhe të vendimit nr.999, datë 25.10.2013, të Këshillit të Ministrave, “Për kriteret dhe procedurat e përfaqësimit, përzgjedhjes, emërimit e shkarkimit, rregullat e funksionimit dhe masën e shpërblimit të anëtarëve të Këshillit të Statistikave”, shpallim thirrjen e hapur për kandidimin si anëtarë të Këshillit të Statistikave”.
Konkurrimi është i hapur për përfaqësues që i përkasin botës akademike dhe shoqërisë civile.
Aplikanti, përfaqësues i botës akademike, mund të jetë nga radhët e trupit akademik të institucioneve të arsimit të lartë, publik ose privat, të liçencuara dhe të akredituara sipas legjislacionit në fuqi për arsimin e lartë.
Ai duhet të plotësojë disa kritere: të jetë shtetas shqiptar, të mos jetë dënuar me vendim gjykate të formës së prerë për kryerjen e një vepre penale, të jetë pedagog me kohë të plotë, të ketë përvojë në punë jo më pak se 10 (dhjetë) vjet në fushën e statistikave, ekonomisë ose shkencave të natyrës apo në fushën e përpunimit të statistikave gjinore, si dhe të zotërojë tituj shkencorë.
Aplikanti, përfaqësues i shoqërisë civile, të jetë nga radhët e organizatave jofitimprurëse, ku gjatë misionit të organizatës përdor ose bën studime në shkencën e statistikës, si dhe ka njohje të mira për gjendjen shoqërore e demografike të vendit, përfshirë edhe treguesit e varfërisë.
Ai duhet të plotësojë disa kritere: të jetë shtetas shqiptar, të mos jetë dënuar me vendim gjykate të formës së prerë të për kryerjen e një vepre penale, të jetë i punësuar me kohë të plotë në organizata të shoqërisë civile, që kanë përvojë në fushën e statistikave ose ekonomisë, ose shkencave të natyrës apo shkencave sociale; të ketë përvojë pune në njërën prej këtyre fushave jo më pak se 3 (tre) vjet; të ketë përvojë në përdorimin e të dhënave statistikore.
Afati i dorëzimit të aplikimit: deri më 30 shtator 2017. /tesheshi.com/
