Pas miratimit nga qeveria të projektligjit për arsimin e lartë, ministrja e Arsimit, Lindita Nikolla doli në një konferencë për shtyp për të shpjeguar ndryshimet.
“Koha e universiteteve që bëjnë sikur japin mësim ka marrë fund. Ne nuk bëjmë kompromis me cilësinë. Kjo është busulla që na ka orientuar në punën tone.
Ligji i ri ndryshon skemën e financimit, duke futur konceptin modern të financimit me bazë performancën.
Një skemë moderne financimi do i shtyjë ato të modernizohen, të përmirësojnë shërbimin e ofruar, të shtojnë bashkëpunimin dhe kërkimin shkencor,” tha Nikolla.
“Ligji i ri u gjendet pranë studentëve në nevojë duke krijuar një fond të posaçëm. Krijohet një fond i posaçëm bursash për degët me prioritet kombëtar dhe mbështet studentët me rezultate ekselente”, vijoi ajo.
Nikolla tha se ligji i ri u jep të drejtë universiteteve që të promovojnë stafin akademik.
Sipas Nikollës, ky ligj nuk çon para publike tek institucionet private, por nxit konkurrencën e drejtë.
Në fakt, ligji i ri është kundërshtuar fort nga ana e pedagogëve dhe universitetit publike, me argumentin se nga ky ligj përfitojnë fonde publike, universitetet private.
