Në mbledhjen e sotme të Qeverisë së Kosovës, kabineti qeveritar ka marrë vendim që të ndajë rreth 27 mijë e 500 euro për komunën e Vitisë për dëmet që janë shkaktuar në këtë komunë gjatë vërshimeve të fundit. Ministri i Financave, Avdullah Hoti ka thënë se kanë pranuar një kërkesë nga komuna e Vitisë ndërsa këto mjete do të merren prej rezervave në bazë të ligjit për financat publike.
“Ne kemi marrë një kërkesë nga komuna e Vitisë për të kompensuar dëmet prej vërshimeve të fundit në vlerë prej 27 mije e 500 euro që janë shkaktuar në shtëpi dhe prona të banimit te cilat komuna e Vitisë nuk mund t’i kompensoj, ne kemi diskutuar edhe me ministrin e Ambientit që në të ardhmen të shohim edhe mundësinë për të investime tjera për të evituar problemet e vërshimeve mirëpo kjo është një shumë ku mund të kompensohen këto familje të cilave ju kanë dëmtuar shtëpitë e banimeve. Mjetet do të merren prej rezervave dhe në bazë të ligjit për financat publike kjo kërkesë përputhet me kërkesat ligjit për ndarjen e mjeteve nga rezerva”, ka thënë ai.
E lidhur me këtë ministri ministri i Bujqësisë, Pylltarisë dhe Zhvillimit Rural, Memli Krasniqi ka theksuar se shumica e këtyre mjeteve lidhen edhe me dëmet që janë bërë në tokat bujqësore dhe se nevojitet një qasje koherente edhe për komunat tjera në të cilat janë bërë dëme nga vërshimet, transmeton kosovalive.
“Ne tashmë kemi filluar të marrim kërkesa edhe nga komunat e rajonit të Anamoravës duke përfshirë Kamenicën, Kllokotin por edhe komuna në rrafshin e Kosovës të cilat janë përfshirë nga vërshimet dhe besoj të kemi pajtueshmëri që nëse kemi fond nga ai rezervë atëherë kompensimet të bëhen për të gjitha komunat sipas kërkesave që vijnë qoftë edhe me nevojën për të bërë një riverifikim të atyre vlerësimeve që po i bëjnë komisionet komunale, por gjithsesi në komunën e Vitisë vërshimet kanë qenë evidente dëmet janë aktuale, shuma nuk është shumë e madhe dhe besoj se ditëve në vijim do të kemi kërkesa konkrete të cilat duhet t’i shqyrtojmë ne”, tha Krasniqi.
