Qeveria italiane e Giusepe Conte-s ka kaluar provën e parë në Senatin italian duke marrë 171 vota, nga 313 votues.
Kryeministri, në fjalën e tij para senatorëve ka bërë të ditur se qeveria e tij nuk do ta largojë vendin e tij nga euro por ka vendosur në program në mënyrë të qartë “përmirësimin e marrëdhënieve me Moskën dhe zbutjen e sanksioneve”.
I ashpër ka qenë reagimi i opozitës.
Matteo Renzi, ish-kryeministër sot senator i opozitës, ka deklaruar në fjalën e tij se qeveria e re lind duke shkelur Republikën e Tretë, pra duke gënjyer zgjedhësit, pasi ka marrë votat duke premtuar se nuk do të ketë asnjëherë një aleancë ndërmjet Lega-s dhe 5 Yjeve.
Sipas Renzi-t, 5 Yjet morën votat e zgjedhësve të së majtës në jug të Italisë, duke u shtirur si një forcë e së majtës, ndërkohë që është një forcë populiste.
Kurse kryeministri Conte replikoi se “ne nuk jemi populistë por jemi forca politike që dëgjojmë popullin”.
Por klima në senat ka qenë mjaft e acaruar. Senatorët e mazhorancës nuk linin rast pa duartrokitur dhe nga ana tjetër opozita duke kundërshtuar.
Presidentja e Senatit, legistja Elisabetta Alberti Casellati, ka ndërhyrë duke kërkuar që të mos aplikohet një “klimë si në stadium”.
Nesër qeveria e re do të kërkojë votëbesimin e në Dhomën e Ulët të parlamentit, ku sipas gjasave do ta marrë me lehtësi. /tesheshi.com/
