Qeveria e Kosovës e ka nisur sot mbledhjen e saj me një minutë heshtje për vdekjen e veprimtarit të çështjes kombëtare, Jonuz Musliu, si dhe për vrasjen e Oliver Ivanoviçit.
E nderimi për politikanin serb, ka ngjallur reagime të mëdha jo vetëm tek përfaqësues të opozitës, por edhe pjesëtarë të kabinetit qeveritar “Haradinaj” dhe ish-deputet.
Zv.ministri i Zhvillimit Ekonomik, Gani Koci e ka quajtur të turpshëm veprimin e qeverisë.
“E pabesueshme! Qeveria do duhej ta dënonte vrasjen e tij siç edhe ka bërë, por të nderohet me një minut heshtje një ish i dënuar për krime lufte dhe i kthyer në rigjykim, kjo nuk do koment! E turpshme!”, shkruan Koci në Facebook.
Ashpër ka reaguar edhe deputetja e Vetëvendosjes, Arbërie Nagavci duke e quajtur veprimin e qeverisë fyerje për qytetarët.
“Kjo Qeveri e papërgjegjshme thua se është në garë me veten për sa më shumë skandale. Sot paska filluar mbledhjen me një minutë heshtje për vdekjen e Ivanoviçit, për personin që u dënua për krime lufte kundër civilëve shqiptar!
Për të qenë paradoksi edhe më i madh sot u nderuan me një minutë heshtje në të njëjtën kohë veprimtari i lirisë Jonuz Musliu dhe krimineli Oliver Ivanoviç.
Ky veprim i sotëm është ofendim për familjet e dhjetra viktimave të luftës që u vranë me urdhër të Ivanoviqit, është tregues i injorancës, inferioritetit dhe servilitetit të kësaj Qeverie, është fyerje për secilin qytetar të Republikës!”, shkruan ajo në Facebook.
Kurse ish-deputeti Gëzim Kelmendi, njëherit kryetar i partisë Fjala, e ka quajtur turp veprimin e qeverisë duke thënë se një kriminel u barazua me një luftëtar lirrie.
“Turpi i rradhës së qeverisë së Kosovës. Sot qeveria e Kosovës në mbledhjen e saj nderoj me 1 minut heshtje kriminelin serb Oliver Ivanoviç që u vra ditë më parë nga terroristët e Serbisë. Ivanoviq ishte i dënuar për krime ndaj shqiptarëve në luftën e fundit në Kosovë.
Të njëjtin nderim me 1 minut heshtje qeveria e Kosovës sot ia dha edhe ish-Komandantit të UÇPMB-së nga Kosova lindore, Jonuz Musliut. Turp, kriminelin serb e barazojnë me luftëtarin e lirisë”, shkruan Kelmendi në Facebook.
Kujtojmë se kryetari i Këshillit Nacional të Shqiptarëve, Jonuz Musliu ishte duke u trajtuar nga një sëmundje në një spital në Turqi, ndërsa vdiq më 18 janar të këtij viti.
Ndërkaq, lideri i iniciativës qytetare serbe “Liria, Demokracia dhe Drejtësia”, Oliver Ivanoviç është qëlluar për vdekje me armë zjarri më 16 janar në veri të Mitrovicës, para zyrave të partisë së tij.
Ndryshe, Ivanoviç akuzohej për krime lufte të kryera në vitin 1999 dhe për nxitje në vrasje të rëndë dhe tentativë vrasje të rëndë në vitin 2000.
Përgatiti: Blendi Gashi – tesheshi.com
