Opozita kosovare ka thirrur për sot një protestë për siç thotë për të kundërshtuar krijimin e komunës së Prilluzhës, e cila mendohet se do të jetë pjesë e integruar e Asociacionit të komunave me shumicë serbe.
Në arsyetimin e dhënë nga ana e atyre që po thërrasin në protestë, thuhet se themelimi i një komune të tillë prek bazenin e thëngjillit dhe termocentralin.
“Prilluzhë, Gracë, Babimoc edhe Plemetin, mendohet të jenë 4 fshatrat fillestarë për ta themeluar Komunën e Prilluzhës. Fshati Plemetin kufizohet me termocentralin dhe me një pjesë të pasurive të thëngjillit në Kosovë. Themelimi i Komunës së Prilluzhës, i jep të drejtë kësaj komune që ta kontrollojë dhe kushtëzojë përdorimin e thëngjillit. Përmes themelimit të kësaj komune dhe integrimit të saj në ‘Zajednicë’, Serbia merr kompetenca vendimmarrëse në përdorimin e thëngjillit të Kosovës”, thuhet në këtë lajmërim.
Por, të gjitha këto pohime të opozitës Qeveria e Kosovës i quan shpifje duke thënë se nuk do të krijohet në asnjë mënyrë një komunë e tillë.
Ekzekutivi kosovar thotë se arsyeja e thirrjes së protestës është krejtësisht e pavërtetë dhe e shpikur nga to, pasi në asnjë moment nuk është biseduar me askënd për themelimin e një komune që pretendojnë opozitarët.
“Pretendimet për krijimin e “komunës së Prilluzhës”, janë një sajim i radhës i tri partive opozitare, të cilat pas diskreditimit publik të kauzave të deritashme dhe metodave jodemokratike të përdorura në kuadër të tyre, po përpiqen që me trillime politike dhe duke mos kursyer mjetet e dhunës, të manipulojnë qytetarët me qëllim që të vijnë në pushtet”, thuhet në reagim.
Qeveria fton partitë opozitare që të heqin dorë nga manipulimet dhe kauzat fiktive dhe që të jenë pjesë e dialogut institucional për avancimin e proceseve integruese euroatlantike të vendit.
Megjithatë, duhet cekur se Qeveria e Kosovës vite më parë ka thënë se Asociacioni do të jetë një Organizatë joqeveritare por ajo doli të jetë e pavërtetë, andaj koha do të tregoj se kush ka të drejtë pushteti apo opozita lidhur me atë se a është kompromisi i radhës i Kosovës që fshati Prilluzhë të bëhet komunë si pjesë e ‘Zajednicës’
/tesheshi.com/
