Institucionet Qendrore të Kosovës deri më sot asnjëherë nuk i kanë bërë kërkesë zyrtarë KFOR-it, për lejimin e togës së nderit të FSK-së që të shoqërojë rivarrimin e Heroit dhe Gjeneralit të pavarësisë së Shqipërisë, Isa Boletinit me bashkëluftëtarët e tij.
Pas pështjellimit që është bërë me vend- rivarrimin e Isa Boletinit, askush nga institucionet dhe familjarët e Isës, nuk e dinë se si do të shkojë ceremonia e rivarrimit. Një gjë është e sigurt, kanë thënë institucionet komunale në Mitrovicës, se Isa Boletini dhe bashkëluftëtarët e tij do të rivarrosen në Boletin, me apo pa Qeverinë e Kosovës dhe Shqipërisë.
Si duket për momentin toga e nderit e FSK-së, nuk do ta shoqërojë Gjeneralin e Pavarësisë së Shqipërisë dhe Heroin Kombëtar Isa Boletinin për në pushimin e tij të përjetshëm në Kullën e tij në fshatin e lindjes dhe atë me fajin e Institucioneve të Kosovës.
Portali ‘Tesheshi’ i ka adresuar pyetje me email, pqendrës së shtypit të KFOR-it në Prishtinë, se a ka marrë KFOR-i ndonjë kërkesë zyrtare nga Institucionet e Kosovës që Togu i nderit i FSK-së të shoqërojë kortezhin e Isa Boletinit në prehjen e tij të fundit në Boletin. Zyrtarë të zyrës së shtypit të KFOR-it në Prishtinë, në përgjigjen e tyre zyrtare përmes emailit i kanë thënë portalit ‘Tesheshi’ se “KFOR-i asnjëherë deri më tani nuk ka marrë asnjë kërkesë formale lidhur me rivarrosjen e Isa Boletinit”.
Në anën tjetër burime të portalit ‘Tesheshi’ nga misioni i NATO-së në Kosovë kanë theksuar se zyrtarë të Institucioneve Qendrore dhe atyre lokale të Kosovës asnjëherë nuk kanë bërë kërkesë që Toga e nderit e FSK-së të shoqërojë rivarrimin e Isa Boletinit. “FSK-ja ka dalë në veri të Mitrovicës dhe Kosovës dhe ka kryer një punë shumë të madhe dhe me rëndësi të veçantë për popullatën serbe dhe shqiptare të Mitrovicës dhe Kosovës, ka thënë burimi.
Sipas të njëjtit burim, ka qenë një klimë shumë e mirë në KFOR, pas suksesit të jashtëzakonshëm të trupave të FSK-së në kërkim të të mbyturit në lumin ‘Ibër’, me ç’rast trupat e FSK-së pa asnjë hezitim gjetën dhe nxorren dhe dy kufoma të kombësisë serbe.
“Nëse institucionet e Kosovës kanë dëshirë aq të madhe që në rivarrimin e eshtrave të Isa Boletnit dhe bashkëluftëtarëve të tij në Boletin të angazhohej edhe FSK-ja, së paku i kishin bërë një kërkesë formale me shkrim KFOR-it”, ka thënë burimi i portalit nga KFOR-i .
Siç duket mos dëshira e Institucioneve apo mosdija e tyre ka ekzistuar pasi që edhe nëse KFOR-i do ta kishte refuzuar daljen e togës së nderit të FSK-së në veri të Kosovës, institucionet së paku është dashur t’i drejtohen me një letër edhe Sekretarit të Përgjithshëm të Aleancës veri-atlantike NATO-së në Bruksel.
Por asnjëra nga këto nuk ka ndodhur, ka thënë burimi i portalit ‘Tesheshi’ nga selia e KFOR-it në Prishtinë. Në anën tjetër Kryetari i Komunës së Mitrovicës Agim Bahtiri, është shprehur i habitur me mungesën e kërkesës nga ana e institucioneve të Kosovës drejtuar KFOR-it për pjesëmarrje të FSK-së në rivarrimin e Isa Boletinit.
“Mua personalisht nga Institucionet qendrore të Kosovës më është thënë se po, kanë bërë kërkesë, por zyrtarisht nuk më është dhënë asgjë” ka thënë Agim Bahtiri. Ndërsa që rreth ceremonisë së rivarrimit, Bahtiri ka qenë i bindur se Isa Boletini do të rivarroset në Boletin me apo pa Institucione qendrore.
“Nëse Qeveria e Kosovës dhe Këshilli Organizativ për rivarrimin e eshtrave të Isa Boletinit nuk e kthejnë vendimin në pikën zero, pra siç ka qenë, atëherë të gjitha përgjegjësitë e rivarrimit do t’i marrë Kuvendi Komunal i Mitrovicës bashkë me familjen e Isa Boletinit, Shoqatat e UÇK-së të dala nga lufta, si dhe me të gjithë intelektualët dhe popullatën e Mitrovicës, Kosovës, Shqipërisë e duke angazhuar këtu edhe diasporën” ka thënë Bahtiri.
Por nëse vendimi kthehet në pikën zero atëherë ceremonia e rivarrimit do të fillojë siç ka qenë e paraparë, ku eshtrat e Isa Boletinit dhe bashkëluftëtarëve të tij do të nisen nga Vlora drejt Tiranës, Prizrenit, Prishtinës Skenderaj -Prekaz, Mitrovicë e Boletin.
Sipas tij, ceremonia kryesore e rivarrimit të eshtrave të Isa Boletinit dhe bashkëluftëtarëve të tij do të mbahet në Stadiumin ‘Adem Jashari’ në Mitrovicë. Ndërsa që për shkak të vendit që është në Boletin, atje do të dërgohen eshtrat Isës, të shoqëruar nga 200 veta, por e gjitha do të varët nga vendimi i Qeverisë së Kosovës dhe Këshillit Organizativ, ka preçizuar Bahtiri.
Në anën tjetër familjarë të Isa Boletinit, nuk kanë dashur të flasin për FSK-në si dhe për ceremoninë e rivarrimit me arsyetim se janë lodhur me gjithë këtë problematikë të zvarritjes së procedurave duke ushqyer polemika të kota. “Familjarët e Isa Boletinit, janë të shokuar me atë që ndodhë rreth rivarrimit të tij” ka thënë një burimi i ‘Tesheshi’, i afërte me familjen. Sipas burimit, familjarët janë të vendosur që Isa, me apo pa ceremoni do të rivarroset në Boletin në vendlindjen dhe Kullën e tij.
Familja nuk është e njoftuar pas kësaj thyerje që ka ndodhë me ceremoninë e rivarrimit, ndërsa që eshtrat e Isa Boletinit i ka familja dhe vetëm stërnipi i tij Gazmend Boletini e di se ku janë, ndërsa që eshtrat e bashkëluftëtarëve të tjerë gjenden në Prishtinë, ka thënë burimi i afërt me familjen e Isa Boletinit.
Më 10 qershor në Boletin pritet të rivarrosen: Isa Boletini, dy djemtë e tij Halil Isa Boletini dhe Zait Isa Boletini, dy demet e vllaut të Isës, Jonuz Ahmet Boletini dhe Halit Ahmet Boletini. Pastaj dy miqtë e Isa Boletinit, Hajdar e Idriz Radishava si dhe kushëriri i Isës nga Isniqi, Misin Niman Balaj.
/tesheshi.com/
