Ministria daneze e Emigracionit publikoi njoftime në median libaneze për të dekurajuar njerëzit të vijnë në vend. Reklamat, publikuar në katër gazetat kryesore të Libanit, vënë në dukje se Danimarka ka reduktuar përfitimet sociale për emigrantët, në mënyrë domethënëse dhe ata që marrin azilin nuk do të lejohen të sjellin edhe familjet e tyre gjatë vitit të parë të qëndrimit. Gjithashtu, në njoftime thuhet se leja e qëndrimit do të jepet vetëm pë rata që flasin gjuhën daneze dhe se azilkërkuesit e refuzuar do të kthehen menjëherë në vendet e origjinës.
Libani, një vend me 4 milionë banorë, ka pritur deri në 1.1 milion sirianë, refugjatë lufte.
Media daneze reagoi ashpër ndaj publikimeve, shumë opinionistë vunë në dukje se lëvizja e autoriteteve daneze bën një kontrast të thellë me qëndrimin mikpritës të Gjermanisë ndaj refugjatëve.
“Danimarka përpiqet të frikësojë emigrantët e ardhshëm me këto publikime”, thuhet mes të tjerave në reagimet e medias në këtë vend.
Kjo lëvizje është ndër të parat e qeverisë së re të krahut të djathtë që erdhi në pushtet pas zgjedhjeve parlamentare të Qershorit.
Ministria e Emigracionit thotë se Danimarka kërkon të ulë numrin e azilkërkuesve, por sërish ajo do të presë 20 mijë refugjatë këtë vit, krahasuar me 14 mijë persona vitin e kaluar.
Në fakt, kriza e refugjatëve tashmë ka mbërritur në Danimarkë, pasi vetëm dje rreth 800 persona hynë nga Gjermania dhe u përpoqën të udhëtojnë drejt Suedisë.
Rasmussen, kreu i qeverisë së re daneze kritikoi BE se nuk po ndjek rregullat për azilkërkuesit dhe se kontrollet kufitare nuk janë zgjidhje. Ai tha se refugjatët që kanë hyrë në Danimarkë do të regjistrohen aty dhe do të presin derisa të shoqërohen nga policia drejt Suedisë. /tesheshi.com/
