“Drejt rrugës së shkronjve për Manastir” është motoja e aktiviteteve që fillojnë sot në qytetin e Manastirit, në 107 vjetorin e alfabetit shqip. Sekretari shtetëror në Ministrinë e Kulturës, Behixhudin Shehapi si përgjegjës për organizimin e aktiviteteve në kuadër të kësaj dite të shenjtë ku do të frymohet shqip, ka përmendur një sër aktivitetesh kulturore.
“Sot fillojnë aktivitetet me organizimin e tribunës për motrat Qiriazi, në bashkëpunim me Forumin e Gruas, pastaj do të organizohet ekspozitë për zonjat e Manastirit në kohën e konsujve, pastaj menjëherë me 21 vazhdon aktiviteti në lidhje me një figurë gjithashtu emblematike për patriotin, Mitat Frashërin, dhe në organizim të Muzeut të Alfabetit organizohet një tribunë shkencore dhe më pastaj do të prezantohet projekti ideor i figurave nga dylli, i cili projekt do të realizohet në kuadër të programit qeveritar për vitin 2016. Krejt ky aktivitet do të përfundojë me një akademi solemne gala koncert në Qendrën për Kulturë në Manastir, ku për herë të parë do të performojë orkestra e Teatrit Kombëtar të Operës dhe Baletit e R. e Shqipërisë, nën dirigjimin e maestros, Edmond Doko, dhe ky aktivitet do të kurorëzohet si rezultat i marrëveshjes se dy shteteve”- deklaroi sekretari shtetëror në Ministrinë e Kulturës, Behixhudin Shehapi.
Gala koncerti do të mbahet me artistët: Shkëlzen Bahtijari, Shkodran Tolaj- tenor, Vikena Kamenica-soprano dhe Armando Likaj-bas, ku do të transmetohet drejtpërdrejt të dielën në TVM2.
Por, sekretari shtetëror në Ministrinë e Kulturës, Behixhurin Shehapi, thotë se qëllimi i festimit treditor kësaj radhe është që ky manifestim të shënohet në manifestim tradicional shtatëditor dhe të titullohet si “Java e alfabetit”, aq sa ka zgjatur Kongresi i Manastirit./tesheshi.com/
