Bashkësia Fetare Islame e Maqedonisë dhe Universiteti i Shkencave Islame, kanë reaguar ndaj një shkrimi të Ali Pajazitit të botuar në portalin “tesheshi.com”, Ku Pajaziti ka kritikuar perormancën e BFI në veprimtarinë e saj.
Me anë të një deklarate të BFI-së dhe FSHI, qasja e zotit Pajaziti cilësohet si tentativë për t’u bërë i rëndësishëm duke sulmuar një institucion të madh siç është edhe BFI-ja. Për transparencë dhe korrektesë ne po botojmë pasazhe nga të dyja qasjet për të kuptuar këtë debat në mënyrë sa më të qartë. Portali ynë është një tryezë e lirë e shprehjes së lirë të debatit dhe ne nuk mbajmë qëndrim …
Në opinionin e tij të datës 5 Qershor, Ali Pajaziti, thekson se: “Një gjë është e qartë: në Maqedoni, institucioni më i lartë fetar, BFI-ja, është në komë. Atë mund ta shpëtojnë vetëm ata që nuk kanë qenë poltronë të sulorexhepizmit, e jo ata të cilët synojnë që përmes puçit të arrijnë në fron, që për besimtarin e vërtetë nënkupton më shumë përgjegjësi, e jo privilegje. Se në çfarë gjendje absurde kemi arritur e tregon më së miri fakti se myftinitë e mbështesin reisin, kurse një myftini e vetme tenton ta monopolizojë tërë BFI-në. Të gjitha vëzhgimet flasin se teologët, të cilët momentalisht janë në konflikt mes vedit, e kanë humbur shpirtin e ulemasë, se janë shndërruar në identitet të veseve, dhe, për fat të keq, kanë arritur klimaksin – apogjeun e anarkisë e të kaosit, që nuk na shpie askund. Është e qartë se kripa është amështuar, dhe shtrohet pyetja se me çka do ta kripim gjellën e jetës fetare? Faktet tregojnë se hendeku mes “alimit faktik” dhe atij të teksteve fetare islame shkon duke u hapur gjithnjë e më tepër?”.
Ndërkaq, në deklaratën e BFI që i përgjigjet shkrimit të Pajazitit theksohet se çdo gjë që ngrihet nuk është aspak parimore, por personale. Në këtë deklaratë thuhet:
“Fushatës së egër mediale antiislame të disa mediave që janë afër Nikolla Gruevskit, e që natë e ditë derdhin helm e vrer kundër BFI-së, i bashkëngjitet edhe Ali Pajaziti! Ose, le të shtrohet ky problem më ndryshe! Kur Ali Pajaziti e ka dhënë më të voglin kontribut për avancimin e jetës institucionale islame? Pse këtë farë “alimi” e paskan margjinalizuar dhe e paskan mbajtur sa më në distancë të gjithë hoxhallarët e vendit, të gjithë profesorët dhe akademikët që janë mbështetësit më të fuqishëm të politikave të Sulejman Rexhepit, të po këtij kryetari i cili një herë e një kohë, e theu rregulloren duke e regjistruar në medrese një jetim që “kishte shprehur dëshirë” për t’u bërë hoxhë? Pse ky farë Ali Pajaziti mendon se vetëm ai mund të jetë doktor dhe jo edhe të tjerët? Nuk e dimë se si e definon sociologjia e tij këtë farë tipi por, me siguri e karakterizon në grupin e personave psikosomatikë. Psikologjia bashkëkohore do ta kualifikonte person me elemente të maniakut, i cili ka të fiksuar në trurin e tij të shkërmoqur një bashkësi fetare e shekujve të mëparshëm, pa administratë profesionale, me teologë të përkulur e të përvuajtur, me hoxhallarë fukarenj e me kapacitete intelektuale të autodidaktit. Vetëm në këtë mënyrë Ali Pajaziti do të ngelte doktori i vetëm, sociologu i vetëm, politikologu i vetëm, teologu i vetëm, profesori i vetëm, hoxha i vetëm që e meriton reisllëkun? Mos ia ka mësyer këtij posti Ali Pajaziti?! BFI në radhët e veta ka qindra doktorë e personalitete të përgatitur e të aftë për të udhëhequr me çfarëdo organi, institucioni, pse jo edhe me BFI-në. Dhe të gjithë këta janë qindra vite para të shkretit Ali Pajaziti.”
Ndërkaq, në reagimin e Fakultetit të Shkencave Islame të Maqedonisë, theksohet:
“Ndonëse e kishte bërë përshesh artikullin me akuza, shpifje dhe nënçmime, prej nga shihet qartë se atij iu është vjetërsuar ilmi dhe aspak nuk është në rrjedha të kohës. Me sa duket profesori i vetëbegenisur ende vazhdon të punojë me versionin operativ 3.11. Këtë radhë i sugjerojmë profesorit që herave të tjera të jetë paksa më i kujdesshëm për hir të intelektualizmit që e pretendon. Të mos plasojë gënjeshtra lidhur me Fakultetin e Shkencave Islame dhe të mos merret me nënçmimin e personelit akademik, të punësuarve dhe studentëve të kësaj vatre të lartë edukative dhe arsimore të vetme në vend, sepse është jo humane, jo njerëzore, jo islame dhe aspak intelektuale. Ndonëse i gjithë stafi akademik janë prej fshatrave, ashtu siç është edhe vetë ai, por kanë të ndërtuar karrierë profesionale intelektuale akademike solide, të njohur dhe të pranuar nga institucione relevante”.
/tesheshi.com/
