Ra shumë në sy prania e një eksponenti të lartë të VMRO-së të Nikolla Gruevskit në mitingun e madh të LSI-së së Ilir Metës në Tiranë.
Që prej prezencës së kryetarit të bashkisë së Shkupit, Koce Trajanovski, në tubimin elektoral të LSI-së, kanë nisur të diskutohen variantet e kësaj pranie të mistershme që lidh ish-pushtetin në Maqedoni me pushtetin aktual të Tiranës, që as më shumë e as më pak pritet ta kurorëzojë pas një muaji me postin më të lartë të Republikës.
Ky diskutim po bëhet jo vetëm në Tiranë, por edhe në Shkup.
Revista e njohur maqedonase Fokus, i ka kushtuar vëmendje prezencës së Trajanovskit në mitingun e LSI-së, dhe e ka lidhur atë me përpjekjet që po bën kryetari i bashkisë së Shkupit për të marrë votat e shqiptarëve që janë pjesë e elektoratit të tij.
Dhe për këtë, eksponenti i VMRO-së ka sjellë një pakt të gatshëm: partia e Gruevskit të ndikojë që LSI-ja të marrë më 25 qershor votat e zgjedhësve maqedonas të fshatrave të bashkisë së Pustecit, në këmbim të një ndërhyrjeje të Ilir Metës te krerët e partive shqiptare në Maqedoni që Trajanovski të zgjidhet sërish.
E në fakt kjo tezë e Fokus-it nuk se është pa gjë, pasi bashkia e Pustecit mori statusin e njësisë territoriale edhe pse nuk plotëson kriterin numerik, me insistimin e Ilir Metës, i cili ka aleancë të vjetër me kryetarin e bashkisë së atyshme, Edmond Themelko.
Ky i fundit ndodhet nën hetim në Maqedoni për manipulim dhe trafik votash në favor të Nikolla Gruevskit. E nga ana tjetër Ilir Meta po lufton fort për votat e minoritetit dhe jo vetëm atij maqedonas.
Përveç Pustecit, strukturat e VMRO-së po ndikojnë edhe në Gollobordë në mënyrë që LSI të arrijë të marrë deputetin në qarkun e Dibrës, ndërkohë që në Fier, në zonën e Libofshës, eksponentët e LSI-së kanë zhvilluar takime në fshatin Rreth-Libofshë ku ndodhet një komunitet me origjinë nga Pazari i Ri apo siç quhet-Novi Pazari, që sot është territor i Serbisë.
Ambasada serbe ka investuar shumë për këtë komunitet dhe është hapur edhe një shkollë që u mëson fëmijëve serbisht.
Gjithashtu LSI po lufton fort të marrë vota edhe në zonën minoritare të qarkut Gjirokastër ku deputet ka Vangjel Tavon, i cili është gjithashtu minoritar.
Meta nga ana e tij dha një intervistë në televizionin grek, ku i bënte thirrje minoritarëve të mos votojnë për Edi Ramën pasi ai nuk do marrëdhëniet e mira me Athinën.
Duke mos pasur partinë e tyre, pra PBDNJ-në në zgjedhje, pasi Vangjel Dule përfaqësohet në listat e PD-së dhe ndodhet vetëm në qarkun Vlorë, në Gjirokastër LSI synon votat e Dropullit, që gjithashtu është bashki më vete dhe Tavo ka influencë të madhe, jo vetëm si banor i saj por edhe për lidhjet e forta që ka me drejtuesit e bashkisë së re.
Duke qenë se ndodhet nën sulmin e fortë të PS-së dhe PD-së, Meta ka nisur një lojë të fortë në këmbim të votave, duke shfrytëzuar të gjitha lidhjet e tij që ka pasur si kryeministër, ministër apo kryetar Kuvendi.
Dhe në fakt nëse LSI-së i shtohen edhe votat minoritare, ato do të jenë të vlefshme për të marrë mandate në Gjirokastër, Korçë, Dibër, Fier, Shkodër apo Kukës.
Edmond Themelko, i cili është drejtues i minoritetit maqedonas në Pustec, apo siç është quajtur gjithmonë-Liqenas, u zgjodh kryetar bashkie në vitin 2015 si përfaqësues i LSI-së.
Këtu vjen edhe shpjegimi i mbrojtjes jo të hapur por gjithsesi solide, që Ilir Meta i bëri Nikolla Gruevskit, sidomos pasi doli parti e parë në zgjedhjet e dhjetorit, duke ndërhyrë tek Ali Ahmeti që të bënte koalicion me VMRO-në.
Madje takimi i parë dhe i fundit i Ahmetit me Gruevskin u bë vetëm me insistimin e Metës, por që nuk pati aprovimin e SHBA-së e BE-së.
Një portal i njohur që qendrën e ka në Prishtinë, por që në fushatën e 25 qershorit është rreshtuar fuqishëm pro LSI-së, doli hapur me qëndrimin për një qeveri të Gruevskit me Ali Ahmetin.
Normalisht nuk ndodhi, pasi kemi të bëjmë me një lëvizje jashtë konjukturave gjeopolitike; por tani aleanca e Ilir Metës me Gruevskin nuk është më jo-formale dhe e fshehtë; ajo ka dalë në dritë, duke shkuar drejt institucionalizimit.
Po ç’kërkon kjo aleancë dhe pse po bashkohet?
Natyrisht duhet pritur rezultati i 25 qershorit, por duket se tashmë ka një pol pushteti që është në opozitë me zhvillimet që po imponohen nga amerikanët dhe europianët.
Madje një nga gjërat që solli në Tiranë e në Shkup zyrtari i lartë i DASH-it, Hoyt Yee, ishte edhe lidhja tangente e dy segmenteve në Tiranë e në Shkup për të paguar influencën e lobimit në Uashington, natyrisht kundër ambasadorëve aktualë në Shqipëri dhe Maqedoni. /tesheshi.com/
