Një ndër premtimet e para që ka dhënë kryetari aktual i Prishtinës gjatë fushatës elektorale ka qenë shitja e veturës luksoze Audi Q7 që e pati blerë paraardhësi i tij Isa Musatafa. Ai u zotua se këtë veturë nuk do shfrytëzojë për shkak se harxhon deri në 26 litra benzinë në 100 kilometra dhe se është tepër luksoze për rrethanat ku jetojnë qytetarët e Kosovës. Premtimin e parë e mbajti, sepse udhëtoi me autobus për në punë, por të dytin ende nuk e ka realizuar.
Shitja e veturës së Isa Mustafës ka dështuar disa herë për shkak se kjo veturë është blerë shtrenjtë dhe nuk ka pasur oferta për ta blerë.
Por pas marrjes së lajmit se shitja është bllokuar për këtë arsye, janë paraqitur disa blerës që kanë shprehur gatishmëri që ta blejnë me këtë kosto të lartë vetëm për ta shitur. Këtë e ka konfirmuar edhe kryetari i Prishtinës Shpend Ahmeti.
Por si duket ka ardhur momenti që të shitet kjo veturë e shumëpërfolur. Sot (e shtunë) ajo do të dalë në një ankand publik, ku pritet që të marrë oferta dhe të shitet.
Vendosjen në shitje të veturës Audi Q7 të blerë nga Isa Mustafa e ka konfirmuar edhe Shtëpia e Ankandeve të Kosovës.
“Ju informojmë se Shtëpia e Ankandeve Kosova në bashkëpunim me Komunën e Prishtinës do të organizojë ankand për shitjen e veturës Audi Q7, veturë kjo e ish-kryetarit të po kësaj komune z.Isa Mustafa. Ankandi do të mbahet të shtunën me datë 17.06.2017 duke filluar nga ora 11:00. Të gjithë të interesuarit janë të mirëseardhur në ankand”, thuhet në njoftim. /tesheshi.com/
