Në një intervistë të dhënë për televizionin Rossiya 1, Putini ka deklaruar prerë se Rusia nuk do të dislokojë trupa tokësore në Siri. “Operacioni ajror rus është përgatitur plotësisht, dhe ai synon thjesht të ndihmojë ofensivën e ushtrisë siriane,” sqaroi presidenti rus.
Çfarëdo që të ngjasë, ne nuk do ta bëjmë këtë [operacion tokësor], dhe miqtë tanë sirianë janë të vetëdijshëm,” tha ai në intervistë.
Sipas tij, detyra parësore e operacionit ajror rus në Siri është “stabilizimi i autoritetit legjitim në këtë vend dhe krijimi i kushteve për gjetjen e një kompromisi politik.”
Gjithashtu, Putini theksoi se e kishte njoftuar koalicionin perëndimor për nisjen e operacionit në Siri, ndërsa, sipas tij, “Rusia nuk ishte lajmëruar kurrë për operacione të ngjashme të planifikuara apo të nisura.”
Putini mori miratimin e parlamentit muajin e shkuar për të nisur një fushatë ajrore në Siri, por ai dhe autoritetet e tjera ruse e kanë mohur mundësinë e dërgimit të trupave tokësore në terrenin e luftës.
Me operacionet ajrore ruse është ndihmuar qartas përparimi i trupave ushtarake të Beshar Esadit. Ndërsa rusët pretendojnë se kanë në objektivin e tyre ISIS-in, shumë prej kundërshtarëve perëndimorë të operacionit japin fakte se po goditet opozita e moderuar siriane. /tesheshi.com/
