Presidenti rus Vladimir Putin i ka kërkuar falje kryeministrit izraelit Naftali Bennett për komentet e bëra nga ministri i Jashtëm Sergei Lavrov për Adolf Hitlerin dhe nazistët.
Dy burrat patën një bisedë telefonike të enjten, ku diskutuan ndër të tjera për situatën në Mariupol dhe civilët e bllokuar.
Referenca për Lavrov dhe komentet e tij bëhet në njoftimin e lëshuar nga zyra e kryeministrit izraelit. Siç u përmend, falja u pranua nga Naftali Bennett.
“Është një veprim mjaft i rrallë, në mos i paprecedentë, nga lideri rus, i njohur për komentet e tij të mprehta. Po aq i mprehtë, madje joelegant, është në shprehjet e tij edhe Sergei Lavrov me përvojë”, u tha nga Izraeli.
Bennett është një nga liderët e paktë që ka kontakte telefonike me presidentin rus, edhe pas fillimit të luftës në Ukrainë. Madje ai vizitoi Moskën në mars, ku pati një bisedë të gjatë në Kremlin me Putinin.
Në një intervistë më 1 maj në televizionin italian Rete 4, të grupit Berlusconi, Sergei Lavrov deklaroi ndër të tjera se “Hitleri ishte gjithashtu me origjinë hebreje”.
I pyetur nga gazetari Giuseppe Brindisi, “Si është e mundur që Zelensky të akuzohet për nazizmin e Ukrainës, pasi ai është me origjinë hebreje?”, Lavrov tha: “Dhe vetë populli hebre, në fund të fundit, thotë se antisemitët më të mëdhenj janë, pikërisht, vetë hebrenjtë.”
Komentet e paprecedentë zemëruan Izraelin, ministria e Jashtme e të cilit tha se kishte thirrur ambasadorin rus duke përdorur “gjuhë të ashpër” ndaj komenteve të Lavrov.
Ministri i Jashtëm izraelit Gair Lapid tha se Lavrov kishte bërë “një deklaratë të pafalshme dhe skandaloze”. /tesheshi.com/
