Avionë bombardues bërthamorë rus kanë fluturuar mbi oqeanin Paqësor, detin e Japonisë, atë të Kinës lindore dhe detin e Verdhë gjatë një stërvitje masive ushtarake.
Operacioni ushtarak i Rusisë nxiti reagimin e Japonisë dhe të Koresë së Jugut, të cilët u përpoqën të largonin avionët rusë.
Ministria e Mbrojtjes e Rusisë tha se bombarduesit Tupolev-95MS fluturuan mbi ujëra neutrale dhe u shoqëruan nga avionë luftarakë.
Kremlini nuk dha detaje të tjera rreth numrit të përgjithshëm të avionëve që kishin marrë pjesë në stërvitjen ushtarake.
Autoritetet ruse nuk shpjeguan gjithashtu përse u zhvillua ky mision ushtarak. N jë tjetër fakt interesant është se bombarduesit bërthamorë u furnizuan me karburant në ajër.
Rusia, e cila ndan kufirin me Korenë e Veriut, ka shprehur vazhdimisht shqetësimin për tensionet në gadishullin korean të shkaktuara nga programi raketor bërthamor i koreano-veriorëve. Rusia është ankuar gjithashtu edhe për planet e Japonisë, që synon të vendosë një sistem anti-raketor amerikan në territorin e saj.
Kjo manovër e Rusisë vjen pas disa javësh tensioneve në gadishull mes Koresë së Veriut dhe SHBA-së. /tesheshi.com/
