Putin, i patrazuar nga shqetësimet e Perëndimit: do vijojmë të furnizojmë qeverinë siriane

Presidenti rus, Vladimir Putin u shfaq i patrazuar nga shqetësimi i Perëndimit për ndihmën që ai po i jep regjimit të presidentit Assad në Siri. Duke folur në një konferencë rajonale për sigurinë në ish-republikën sovjetike të Taxhikistanit, Putin theksoi se Moska e mbështet qeverinë e Sirisë në luftën e saj kundër agresionit terrorist. “Ne e kemi furnizuar edhe do të vijojmë ta furnizojmë me të gjithë mbështetjen ushtarake të duhur”, tha presidenti rus.

Agjencitë e lajmeve kanë njoftuar më herët se Rusia ka dërguar njësi të artilerisë dhe shtatë tanke në një bazë siriane në afërsi të Latakias, si pjesë e rritjes së pranisë ushtarake në Siri.

Ky shtim i trupave dhe mbështetjes për Assad ka bërë që në Perëndim të bjerë alarmi për ndikimet që mund të sjellë ndihma ushtarake e Moskës për aleatin e vjetër të saj.

Rusia vetë e mohon se po shton praninë ushtarake në Siri, por pranon se do të vijojë të mbështesë presidentin sirian. Ekspertët thonë se ekziston rreziku që Rusia të godasë grupet kryengritëse që mbështeten nga Perëndimi e që luftojnë kundër regjimit, duke rrezikuar kështu një konfrontim me forcat që luftojnë Shtetin Islamik.

Në pikëpamjen e Moskës, duhen marrë në konsideratë vullneti dhe dëshira e Assad për të bashkëpunuar me opozitën që ai e quan “të shëndetshme” në mënyrë që të gjendet zgjidhje për luftën civile që vijon prej katër vjetësh e gjysmë.

Gjithsesi, Rusia thotë se përballja me Shtetin Islamik është prioriteti më i madh.

Dora e fortë e Kremlinit shkon edhe më tej, duke thënë se mbështetja e Moskës ndaj autoriteteve siriane është legjitime dhe se kriza e refugjatëve në Europë do të kishte përmasa edhe më të mëdha nëse Rusia nuk do të mbështeste Assadin.

“Nëse Rusia nuk do të mbështeste Sirinë, situata në vend do të ishte më e rëndë edhe se në Libi dhe fluksi I refugjatëve do të ishte shumë më I madh”, theksoi Putin. /tesheshi.com/