Presidenti rus, Vladimir Putin, ka thënë se është arritur një marrëveshje në lidhje me një plan për arritjen e një armëpushimi për Sirinë në mbarë vendin, me Rusinë dhe Turqinë si garantues, njofton Al Jazeera.
Agjencia shtetërore e lajmeve siriane, SANA tha të enjten se shpallja e armëpushimit përjashton Shtetin Islamik të Irakut dhe grupit Levant (ISIS) dhe Jabhat Fateh al-Sham, grupi i njohur më parë si al-Nusra.
Putin tha se është marrë një vendim që armëpushimi të fillojë të enjten në mesnatë, i cili pastaj do të pasohet nga bisedimet për paqe në mes të qeverisë së presidentit sirian Bashar al-Assad dhe opozitës në Astana, kryeqytetin e Kazakistanit.
Sergei Shoigu, ministri i Mbrojtjes së Rusisë tha se armëpushimi do të përfshijë 62.000 luftëtarë të opozitës në të gjithë Sirinë, dhe se ushtria ruse ka vendosur një linjë telefonike me homologun e tij turk për të monitoruar pajtueshmërinë.
Ministria e jashtme turke konfirmoi marrëveshjen, dhe u bëri thirrje vendeve me ndikim tek grupet që po luftojnë në vend, që të sigurojë mbështetjen e nevojshme për mbarëvajtjen e armëpushimit.
“Rusia dhe Turqia mbështesin fuqimisht armëpushimin dhe do të monitorojnë atë së bashku”, tha ministria.
Ankaraja dhe Moska kanë qenë të pozicionuara në anë të kundërta në luftën civile siriane, me Turqinë që ka kërkuar largimin e Asadit, i cili është mbështetur nga Rusia dhe Irani.
Konflikti sirian filloi si një kryengritje kryesisht e paarmatosur kundër Asadit në mars të vitit 2011, por e cila më vonë u shndërrua në një konflikt të armatosur.
Staffan de Mistura, i dërguari i posaçëm i OKB-së për Sirinë, kishte vlerësuar në muajin prill se më shumë se 400 mijë sirianë janë vrarë që nga viti 2011.
Llogaritja e numrit të saktë të vdekjeve është e vështirë, pjesërisht për shkak të zhdukjes me forcë të dhjetëra mijëra sirianëve, fati i të cilëve mbetet e panjohur.
Gati 11 milionë sirianë – gjysma e popullatës së paraluftës në vend – janë zhvendosur nga shtëpitë e tyre. /tesheshi.com/
